नागपूर :- राज्यातील महसूल कार्यालयांच्या कार्यक्षेत्रात फरबदल/ नवीन कार्यालये निर्मिती तसेच महसूली कायद्यांमध्ये आवश्यकतेनुसार बदलांबाबत शिफारशी करण्याकरिता उमाकांत दांगट यांचे अध्यक्षतेखाली समिती गठीत करण्यात आलेली आहे. या समितीस सर्वसामान्य जनतेच्या दैनंदिन आयुष्यावर परिणाम करणाऱ्या बाबी, सामाजिक परिस्थितीत झालेला बदल व इतर अनुषंगिक बाबींमुळे महसूल कामकाजाशी संबंधित महत्वाच्या कायद्यांमध्ये कालानुरुप बदल करणे आवश्यक आहे किंवा कसे हे तपासून शासनास अहवाल सादर करावयाचा आहे.
त्या अनुषंगाने महाराष्ट्र धारण जमिनीचे तुकडे पाडण्यास प्रतिबंध व त्यांचे एकत्रीकरण करण्याबाबत अधिनियम, 1947, महाराष्ट्र कुळवहिवाट आणि शेतजमीन अधिनियम 1948 व त्याखालील नियम, महाराष्ट्र शेतजमीन (जमीन धारणेची कमाल मर्यादा) अधिनियम 1961 व महाराष्ट्र जमीन महसूल संहिता 1966 व त्याअंतर्गत असलेले नियम या कायद्यांमध्ये कालसुसंगत सुधारणा करण्याच्या अनुषंगाने आपल्या काही सूचना असतील तर गुरुवार दि.15 फेब्रुवारीपर्यंत महसूली कार्यालये पुनर्रचना व महसूल कायदे सुधारणा समितीच्या कार्यालयाकडे समक्ष/ पोस्टाव्दारे/ ईमेल द्वारे खालील पत्ता व ई-मेल आयडी वर पाठविण्यात याव्यात. तसेच ज्यांना सूचना समक्ष सादर करावयाच्या आहेत त्यांना शुक्रवार दि. 16 फेब्रुवारी रोजी सकाळी 11 वाजता सदस्य सचिव तथा उप आयुक्त (सामान्य प्रशासन), विभागीय आयुक्त कार्यालय, पुणे विभाग, पुणे, विधानभवन, बंड गार्डन रोडे, पुणे तसेच ईमेल rev.reformcomt@gmail.com या पत्यावर समक्ष उपस्थित राहून समितीसमोर सादर कराव्या, असे समितीमार्फत कळविण्यात आले आहे.
