– ई-बिल, ई-व्हाऊचर प्रणालीचे उद्घाटन
नागपूर :- विविध शासकीय कार्यालयातील दुरध्वनी, विद्युत आदि देयके ई-बिल प्रणालीव्दारे कोषागारात सादर करणे सुलभ झाले असुन सर्वच देयके या प्रणालीव्दारे स्विकारण्यात येणार आहेत. ई-बिल प्रणालीव्दारे कोषागारात देयके सादर करुन या सुविधेचा लाभ घेण्याचे आवाहन कोषागार विभागाचे अपर मुख्य सचिव आशिष कुमार सिंह यांनी केले आहे.
जिल्हाधिकारी कार्यालयाच्या परिसरात जिल्हा कोषागार कार्यालयात ई-बिल प्रणाली, ई-बिल व्हाऊचर तसेच ई-हस्ताक्षर प्रणालीचे उद्घाटन अपर मुख्य सचिव आशिष कुमार सिंह यांच्या हस्ते झाले. यावेळी मार्गदर्शन करतांना ते बोलत होते.
लेखा व कोषागारे संचालक दिपा देशपाडे, सहसंचालक ज्योती भोंडे, स्वप्नजा सिदंकर, सहसंचालक (माहिती व तंत्रज्ञान) गिता नागर, वरिष्ठ कोषागार अधिकारी बालकृष्ण नायर, विशाल नलदूरकर, महेश घोडके आदी यावेळी उपस्थित होते.
सर्व शासकीय कार्यालयातील दुरध्वनी, विद्युत आदि देयके इलेक्ट्रॉनिकली सादर करणे शक्य झाले आहेत. इतर देयके सुध्दा या प्रणालीव्दारे स्विकारण्याची सुविधा लवकरच उपलब्ध होईल. आहरण व संवितरण अधिकाऱ्यांनी या सुविधेचा लाभ घ्यावा, असे आवाहन आशिष कुमार सिंह यांनी यावेळी केले. प्रारंभी कोषागारातील ई-बिल व्हाऊचर या प्रणालीची पाहणी अपर मुख्य सचिवांनी केली.
जिल्हा कोषागार कार्यालयाला प्रमाणके इलेक्ट्रॉनिकली महालेखाकार कार्यालयाकडे सादर करणे सुलभ होणार असून या कार्यप्रणालीमुळे आहरण व संवितरण अधिकाऱ्यांना संदेशवाहकावीना देयके कोषागारात इलेक्ट्रॉनिकली सादर करता येतील. टप्या-टप्याने सर्व आहरण व संवितरण अधिकारी या सुविधेचा उपयोग घेवू शकतील. या प्रणालीव्दारे यापुढे देयके सादर करावीत असे आवाहन लेखा व कोषागारे विभागाच्या सहसंचालक ज्योती भोंडे यांनी केले आहे.
