नागपूर :- केंद्रीय मंत्री नितीन गडकरी यांच्या संकल्पनेतून नागपूर शहरात सुरू असलेल्या खासदार क्रीडा महोत्सवातील लेदर बॉल क्रिकेट स्पर्धेमध्ये नागपूर महानगरपालिका आणि दक्षिण पूर्व मध्य रेल्वे संघाने प्रतिस्पर्धी संघांना पराभूत करीत विजय मिळविला.
डब्ल्यूसीएल मैदानात सुरू असलेल्या स्पर्धेमध्ये बुधवारी (ता.17) मनपा संघाची लढत एमएसआरटीसी संघाशी झाली. या सामन्यात मनपा संघाने 7 गड्यांनी विजय मिळविला. प्रथम फलंदाजी करणा-या एमएसआरटीसी संघाने निर्धारित 10 षटकांमध्ये 4 बाद 84 धावा काढल्या. संघाकडून इमरान शेखने सर्वाधिक 42 धावा काढल्या. मनपा संघाच्या नीरजने 1 गडी बाद केला इतर अन्य गडी धावबाद ठरले. मनपा संघाने फलंदाजी करताना 7.3 षटकांमध्ये 3 बाद 83 धावांचे लक्ष गाठले व सामन्यात विजय मिळविला. संघाकडून मनीषने सर्वाधिक 42 धावांचे योगदान दिले.
दुस-या सामन्यात दक्षिण पूर्व मध्य रेल्वे संघाने नागपूर मेट्रो संघाचा 7 धावांनी पराभव केला. प्रथम फलंदाजी करीत रेल्वे संघाने निर्धारित 10 षटकांमध्ये 6 बाद 91 धावांचे डोंगर उभारले. संघाकडून चंद्रशेखरने सर्वाधिक 26 धावा काढल्या. मेट्रोच्या स्नेहल तांबे ने 2 गडी बाद केले. विजयी लक्ष्य गाठण्याच्या उद्देशाने मैदानात उतरलेला नागपूर मेट्रो संघ निर्धारित 10 षटकांमध्ये 6 बाद 84 धावाच करू शकला. संघाकडून नितीन गौरने 36 धावांचे योगदान दिले. रेल्वे संघाच्या लोकेश आणि योगेश यांनी प्रत्येकी 2 गडी बाद केले.
