नागपूर :- शहरांतर्गत येणाऱ्या हिंगणा पोलीस स्टेशन हद्दीतील बनवाडी येथील अशोक शेवडे यांच्या शेतातील घराचे कुलूप तोडून पन्नास हजाराचा माल चोरून नेणाऱ्या घटनेला नऊ दिवस होऊनही पोलीस अजून पर्यंत स्पॉट बघायला आलेले नाहीत.
बनवाडी हे गाव मानेवाडा पासून दक्षिणेस 12 किलोमीटर अंतरावर मुख्य रस्त्यावर आहे. अशोक शेवडे यांनी शेतात वस्तू ठेवण्याच्या दृष्टीने घराचे बांधकाम केले. चोरट्याने त्या घराचा टाला तोडून मोटार पंप, झटका मशीन, टिल्लू पंप, वायरचे बंडल आदी असा जवळपास 50 हजाराचा माल अज्ञात चोरट्याने चोरून नेला. 
त्याची लेखी तक्रार अशोक शेवडे यांनी स्वतः 6 फेब्रुवारीला हिंगणा पोलीस स्टेशन येथे जाऊन दिली. परंतु आजपर्यंत पोलिसांनी त्या स्पॉटवर येऊन साधी चौकशीही केली नाही. त्यामुळे शेतमालक अशोक शेवडे यांच्या त्या घरातील सामान आजही अस्ताव्यस्त पडलेले आहे.
पोलीस जोपर्यंत येऊन पंचनामा करत नाही तोपर्यंत त्याची विल्हेवाट सुद्धा करता येत नाही. पोलिसांनी विनाविलंब येऊन चौकशी करून, त्या चोराला जेरबंद करावे अशी मागणी अशोक शेवडे यांनी केलेली आहे. अशोक शेवडे हे बसपा नेते उत्तम शेवडे यांचे मोठे भाऊ होत.
