नागपूर :- नागपूर शहरातील भानखेडा ते लष्करीबाग क्षेत्राला जोडणाऱ्या पाचपावली उड्डाणपूल ते पहेलवानशहा दर्गा रस्त्यावर रेल्वे उड्डाणपूल बांधकामाकरीता खाजगी जमीन संपादित करण्यासाठी बुधवारी (ता.१५) मनपा आयुक्त तथा प्रशासक डॉ अभिजीत चौधरी यांनी मनपा व महारेलच्या अधिकाऱ्यांसोबत जागेची पाहणी केली. याप्रसंगी मनपाच्या नगर रचना विभागाचे उपसंचालक प्रमोद गावंडे, महारेलचे ज्येष्ठ महाप्रबंधक डी.आर. टेंभुर्णे, सहायक आयुक्त गणेश राठोड, हरीश राऊत आदी उपस्थित होते.
पाचपावली उड्डाणपूल ते पहेलवानशहा दर्गा रस्त्यावर रेल्वे उड्डाणपूल निर्मितीसाठी काही खाजगी मालमत्तांचे भूसंपादन करण्याची गरज असल्याचे अधिकाऱ्यांनी यावेळी आयुक्तांना सांगितले. महाराष्ट्र प्रादेशिक नियोजन व नगर रचना अधिनियम १९६६ अंतर्गत या रस्त्याची रुंदी २३ मीटर करण्यासाठी महाराष्ट्र शासनाची परवानगी प्राप्त झाली आहे, अशी माहिती उपसंचालक नगर रचना विभाग यांनी दिली.
या उड्डाणपुलामुळे या भागातील नागरिकांना येण्या-जाण्याच्या दृष्टीने मोठा लाभ होणार आहे. त्यांना थेट कामठी रोड किंवा रेल्वे स्टेशनकडे जाता येईल. यावेळी आयुक्तांनी सर्व अधिकाऱ्यांशी सविस्तर चर्चा केली.
या प्रसंगी महारेल चे डी.जी.एम. विजय उदापूरे, गांधीबाग झोनचे कार्यकारी अभियंता सचिन रक्षमवार, नगर रचना विभागाचे सहायक अभियंता राजेंद्र जीवतोडे, मनपाचे सुरेश खरे, रोशन जांभुळकर आदी उपस्थित होते.
