संदीप कांबळे, विशेष प्रतिनिधी
कामठी :- नागपूर शहर पोलीस आयुक्तालय अंतर्गत येणाऱ्या नवीन कामठी व जुनी कामठी पोलीस स्टेशन हद्दीत वाढती लोकसंख्या व गुन्हेगारीचा आलेख बघता कामठी शहरातील पूर्ववत बंद पडलेल्या पोलीस चौक्या नित्याने सुरू करणे गरजेचे आहे.
याचबरोबर काही ठिकाणी नवीन पोलीस चौक्या सुरू कराव्यात अशी अपेक्षा व्यक्त करण्यात येत आहे.
मागील काही महिन्यापासून कामठी शहरात चोरीसह, घरफोडी तसेच इतर गुन्हेगारीचे प्रमाण वाढले आहे.त्यातही काही नागरीक पोलिसांच्या चौकशीचा त्रास नको म्हणून चोरी झाली तरी त्याची पोलीस ठाण्यात नोंद करण्यास धजावत नाहीत.वास्तविकता चोरीच्या घटनांवर प्रतिबंध घालण्यासाठी पोलिसांप्रमाणे नागरिकांनीही सतर्क राहणे गरजेचे आहे. बाहेरगावी जाताना जवळच्या पोलीस ठाण्यात सूचना देण्याचे आवाहन करूनही नागरिक या आवाहनाला दाद देत नसल्याने चोरीच्या घटनांमध्ये वाढ झाल्याचे पोलिसांचे मत आहे. तर आगामी निवडणुकाचा वेळ लक्षात घेता शहरातील कायदा व सुव्यवस्था नियंत्रणात राहावे यासाठी नागरि हितार्थ शहरातील मुख्य ठिकाणी पोलीस चौक्या सुरू करण्यात याव्या अशी मागणी जोर धरत आहे.
कामठी पोलीस स्टेशन हद्दीत एकमेव ड्रॅगन पॅलेस पोलीस चौकी नामधारी म्हणून कार्यरत आहे त्यातील मोदी पडावं पोलीस चौकी अजूनही बंद अवस्थेत आहे तेव्हा गरजेचे असलेल्या मच्छिपुल चौक, गोयल टॉकीज चौक, फेरूमल चौक,भाजी मंडी चौक, पासीपुरा मैदान, रमानगर, रामगढ आदी ठिकाणी पोलीस चौक्या उभारण्यात याव्या अशी मागणी जोर धरत आहे.