नागपूर :- गृहमंत्री व उपमुख्यमंत्री देवेंद्र फडणवीस यांच्या शहरात २०२२ या वर्षाच्या तुलनेत वर्ष २०२३ मध्ये खून, खुनाचा प्रयत्न, दरोडा, चोरीसह इतरही काही गंभीर गुन्हे वाढले आहेत. परंतु गेल्या आठ वर्षांची सरासरी दाखवत गुन्हे कमी झाल्याचा दावा पोलीस आयुक्त अमितेश कुमार यांनी केला आहे.
पोलीस भवन येथे शुक्रवारी झालेल्या अनौपचारिक चर्चेत पोलीस आयुक्त अमितेश कुमार म्हणाले, २०२२ मध्ये शहरात गंभीर संवर्गातील गुन्हे खूपच कमी करण्यात पोलिसांना यश आले होते. २०२३ मध्येही ही स्थिती कायम आहे. २०२२ मध्ये शहरात ६५ खून झाले होते, २०२३ मध्ये ७३ खून झाले. २०२२ मध्ये शहरात १०२ खुनाचे प्रयत्न तर २०२३ मध्ये ११० खुनाचे प्रयत्न झाले. २०२२ मध्ये शहरात १६७ दरोडे तर २०२३ मध्ये २३६ दरोड्यांच्या घटना घडल्या. २०२२ मध्ये शहरात ७३२ चोऱ्या तर २०२३ मध्ये ८३६ चोऱ्या झाल्या. २०२२ मध्ये २५० बलात्कार तर २०२३ मध्ये २४७ बलात्कार झाले. इतरही गुन्ह्यात कमी-अधिक वाढ वा घट झाली आहे.
शहरात २०२२ मध्ये ७ हजार ७९६ गुन्हे घडले तर २०२३ मध्ये ९ हजार २४५ गुन्हे नोंदवले गेले. २०२२ च्या तुलनेत २०२३ मध्ये किंचित गुन्हे वाढलेले दिसत असले तरी आरोपी पकडण्याचे प्रमाण २०२३ मध्ये वाढले आसून २०२२ मध्ये गुन्हे खूपच कमी राखण्यात पोलिसांना यश आले होते. हे गुन्हे खूपच कमी असल्याने यंदा थोडी वाढ दिसत असल्याचे अमितेश कुमार यांनी सांगितले. तर यंदा मोबाईल मिसिंगऐवजी मोबाईल चोरीच्या नोंदी केल्याने चोऱ्या वाढलेल्या दिसत असल्याचेही त्यांनी सांगितले. त्यातच गेल्या आठ वर्षांची सरासरी काढल्यास शहरात वर्षाला ९५ खून व्हायचे. ही संख्या २०२३ मध्ये ७३ आल्याने गुन्हे गेल्या आठ वर्षांची सरासरी करता कमी झाल्याचे अमितेश कुमार यांनी सांगितले. शहरातील निम्मे खून कौटुंबिक कलहातून झाले. या खुनाचा छडा लावणे कठीण असते. परंतु पोलिसांनी त्यात चांगले यश मिळवले. तर बलात्काराच्या सर्वाधिक घटना ओळखीच्या व्यक्तीकडून घडल्याचे निदर्शनात आल्याचेही अमितेश कुमार म्हणाले. यावेळी शहर पोलीस खात्यातील सर्व वरिष्ठ पोलीस अधिकारी उपस्थित होते.
