नागपूर :- लवकरात लवकर स्वतंत्र विदर्भ राज्याची निर्मिती करावी, अन्यथा येत्या १५ ऑगस्टपासून चंद्रपूर जिल्ह्यातील राजुरा येथील मस्की दाम्पत्य लोखंडी पिंजऱ्यात आमरण उपोषण करणार असल्याची माहिती जय विदर्भ पार्टीचे राष्ट्रीय अध्यक्ष अरुण केदार यांनी सोमवारी आयोजित पत्रकार परिषदेत दिली.
आज विकासाच्या दृष्टीने विदर्भ महाराष्ट्रच्या १०० पट मागासला आहे. यास सर्वस्वी आमचे आजी माजी आमदार-खासदार, मंत्री काँग्रेस व भाजपचे मुख्यमंत्री-उपमुख्यमंत्री हे जबाबदार आहेत. जर का विदर्भाच्या जनतेची, युवकांची, शेतीची शेतकऱ्यांची उन्नती करायची असेल तर आता विदर्भ राज्य निर्माण करणे आहे. त्यासाठी आम्ही जय विदर्भ पार्टीच्या नेतृत्वात व विदर्भप्रेमी शोभा मस्की व बाबा मस्की रविवार, ११ ऑगस्ट २०२४ पासून लोखंडी पिंजऱ्यात स्वतःला कोंडून महाराष्ट्र अन्याय करीत आहे, असे प्रतिकात्मक निषेध आंदोलन करणार असल्याचेही केदार यांनी सांगितले. १५ ऑगस्ट २०२४ पासून शोभा मस्की ह्या लोखंडी पिंजऱ्यात स्वतःला कोंडून संविधान चौक, नागपूर येथे अन्यत्याग आंदोलन करणार आहेत.
या आंदोलनाला संपूर्ण विदर्भवादी जनता, युवक, जय विदर्भपार्टी, भारतराष्ट्र समिती, विदर्भ राज्य आंदोलन समिती, नाग विदर्भ आंदोलन समिती, विदर्भवीर भाऊ जांबुवंतराव धोटे विचारमंच, फॉरवर्ड ब्लॉक पार्टी, विदर्भ राज्य आघाडी व नागपूरची जनता व विदर्भातील ३ कोटी जनता या सर्वांनी मस्की दाम्पत्यांच्या आंदोलनाला तन-मन- – जनदेऊन सहकार्य करावे, असे आवाहनही केदार यांनी याप्रसंगी केले.
मस्की दाम्पत्य करणार आमरण उपोषण आम्ही घरी जाणार नाही
आम्ही दोघेही १० ऑगस्ट २०२४ पासून प्रतिज्ञा घेणार आहोत की, ‘जोपर्यंत विदर्भ राज्य निर्माण होणार नाही तोपर्यंत आपल्या घरी जाणार नाहीत व लोखंडी पिंजऱ्यातच वास्तव्य करून विदर्भभर जनजागृती करणार असल्याचे बाबा मस्की व शोभा मस्की यांनी यावेळी सांगितले. १० ऑगस्टला दुपारी १२ वाजता यशवंत स्टेडियम ते विधानभवनापर्यंत लाँगमार्च काढण्यातयेणार आहे. यानंतर विधानभवनावर स्वतंत्र विदर्भराज्याचा झेंडा फडकवणार असल्याचे बाबा मस्की यांनी सांगितले
