नागपूर, ता. २२ : स्वातंत्र्याच्या अमृत महोत्सवी वर्षानिमित्त नागपूर महानगरपालिकेच्यावतीने प्रभाग क्र. १९ अंतर्गत बजेरीया येथील नन्हुमल इमारतीजवळील राजकुमार गुप्ता समाजभवन येथे मंगळवारी (ता.२२) महापौर दयाशंकर तिवारी यांच्या हस्ते जय बजरंग व्यायामशाळेचे लोकार्पण करण्यात आले.
कार्यक्रमाला मध्य नागपूरचे आमदार विकास कुंभारे, गांधीबाग झोन सभापती श्रद्धा पाठक, नगरसेवक ॲड. संजय बालपांडे, नगरसेविका विद्या कन्हेरे, नगरसेविका सरला नायक, विनायकराव डेहनकर, ब्रजभूषण शुक्ल अजय गौर, हरीश महाजन आदी उपस्थित होते.
यावेळी बोलताना महापौर दयाशंकर तिवारी म्हणाले, बजेरिया येथील राजकुमार गुप्ता समाजभवनमधून प्रभागातील जनतेला अनेक सुविधा प्रदान करता आलेल्या आहेत. कोरोनाच्या संकटाचा सामना करताना नागरिकांना लसीकरण उपलब्ध व्हावे यासाठी या समाजभवनामध्ये लसीकरण केंद्र सुरू करण्यात आले. २४ हजारावर लोकांचा जीव वाचविण्यासाठी लसीकरणाचे कार्य समाजभवनातून झाले आहे. समाजभवन मध्ये लग्न कार्य व इतर कार्य व्हायचे. यामध्ये असामाजिक तत्वांचा वावर असल्याने नागरिकांना त्रास व्हायचा. नागरिकांच्या तक्रारीवर दखल घेत सभागृहाची स्वच्छता करून येथील नागरिकांच्या सुविधेसाठी व्यायामशाळा तयार करण्याचे निश्चित झाले. या व्यायामशाळेत आधुनिक उपकरणे, प्रशिक्षकांची व्यवस्था आणि व्यायामशाळेचे योग्य संचालन व्हावे यासाठी १५० रुपये एवढे नाममात्र शुल्क घेण्याचा निर्णय घेण्यात आला असल्याचेही त्यांनी सांगितले.
आमदार विकास कुंभारे यांनी यावेळी महापौर दयाशंकर तिवारी यांच्या नेतृत्वात शहरात सुरू असलेल्या विकास कामांची प्रसंशा करीत त्यांचे अभिनंदन केले. मध्य नागपुरातील भागांमध्ये होत असलेल्या विकास कामांसाठी आवश्यक ते सर्व सहकार्य करण्याची ग्वाही त्यांनी यावेळी दिली.