– 17 वर्षाखालील शालेय स्पर्धेमध्ये मुले व मुली गटाचे अजिंक्यपद
नागपूर :- क्रीडा व युवक सेवा संचालनालय, महाराष्ट्र राज्य पुणे अंतर्गत जिल्हा क्रीडा परिषद तथा जिल्हा क्रीडा अधिकारी कार्यालय नागपूर व नागपूर जिल्हा व्हॉलीबॉल संघटना यांचे संयुक्त विद्यमाने दिनांक 4 ते 6 ऑक्टोबर 2024 दरम्यान आयोजित 17 वर्षाखालील राज्यस्तरीय शालेय व्हॉलीबॉल क्रीडा स्पर्धेमध्ये पुणे विभागाने मुले व मुलींच्या दोन्ही गटाचे अजिंक्यपद प्राप्त केले.
आनंद नगर स्पोर्ट्स असोसिएशन, नागपूरचे मैदानावर सुरू असलेल्या या स्पर्धेमध्ये मुलांच्या गटात अत्यंत चुरशीच्या सामन्यात पुणे विभाग संघाने छत्रपती संभाजीनगर संघाचा 3-1 अशा डावाने पराभव करीत विजेतेपद पटकाविले. तर मुलींच्या गटात पुणे विभागाने कोल्हापूर विभागाचा 3-0 अशा सरळ डावाने पराभव करीत विजेतेपद प्राप्त केले. मुलांच्या गटात लातूर विभागाने व मुलींच्या गटात नागपूर विभागाने तृतीय स्थान प्राप्त केले.
सदर स्पर्धेचे बक्षीस वितरण नागपूर दक्षिण मतदार संघाचे आमदार मोहन मते, शेखर पाटील उपसंचालक, क्रीडा व युवक सेवा नागपूर, माजी नगरसेविका दिव्या धुरडे, जिल्हा क्रीडा अधिकारी पल्लवी धात्रक, अरविंद गवई व इतर मान्यवर यांचे प्रमुख उपस्थितीत पार पडला. याच स्पर्धेतुन राष्ट्रीय शालेय स्पर्धेसाठी महाराष्ट्र राज्य संघाची निवड केली जाणार आहे.
