बेला :- गावातील पांढरीच्या मारोती देवस्थानात संकटमोचन हनुमानाचा जन्मोत्सव थाटात व उत्साहात साजरा करण्यात आला. मंदिरासमोरील हनुमान भक्त व ज्येष्ठ नागरिक बळीरामजी रोडे गेल्या 50 वर्षापासून येथे हनुमान जयंती साजरी करतात. यंदाही त्यांच्या कुटुंबीयांतर्फे पहाटे हनुमंताची पूजा अर्चना व अभिषेक करण्यात आला. सदर जागृत व पुरातन देवस्थानात लग्नापूर्वी नवरदेव येथे येतो. व लग्न मंगल कार्य निर्विघ्न पार पडू दे. यासाठी प्रार्थना केली जाते. लोकसहभागातून दोन वर्षांपूर्वीला जीर्णोद्धार केल्यामुळे देवस्थानाचे रूपडे पालटले.हनुमान जयंतीचे निमित्ताने देवस्थानात आयोजित संगीतमय भजनाचा लाभ गावातील व मोहल्यातील भाविकांनी घेतला. रात्रीला असंख्य भक्त स्वरूची भोजनाने तृप्त झाले. जन्मोत्सवाचे यशस्वीतेसाठी पंकज रोडे, मोहल्ल्यातील भक्तगण व रोडे कुटुंबीय व नातलगांनी अथक परिश्रम घेतले.
