नागपूर :- साहित्यभूषण लोकशाहीर अण्णाभाऊ साठे यांच्या पुण्यतिथी निमित्त मंगळवारी १८ जुलै रोजी भारतीय जनता पार्टीतर्फे अभिवादन करण्यात आले. दीक्षाभूमी जवळील साहित्यभूषण लोकशाहीर अण्णाभाऊ साठे स्मारक स्थळी भाजपा प्रदेश उपाध्यक्ष ॲड. धर्मपाल मेश्राम अण्णाभाऊ साठे यांच्या पुतळ्याला पुष्पमाला अर्पण करून वंदन केले.
याप्रसंगी भाजपा अनुसूचित जाती मोर्चाचे महामंत्री सतीश शिरसवान, आदेश वाशिमकर, राजू वाल्मिकी, राजेश बावणे, विजय डोंगरे, सतीश गायकवाड, विजय हिवराडे, दिलीप झाडे, कार्तिक ढोके आदी उपस्थित होते.
आपल्या धारदार लेखणीतून असंख्य कथा, कादंब-या, पोवाडा, लावण्या ,वग लिहिणारे साहित्यसम्राट लोकशाहीर अणणाभाऊ साठे यांचे महात्म्य शब्दात मांडता न येणारे असल्याची प्रतिक्रीया यावेळी ॲड. धर्मपाल मेश्राम यांनी दिली. सांगली जिल्ह्यात वाळवा तालुक्यातील वाटेगाव या लहानश्या गावात जन्मलेल्या तुकाराम भाऊराव ऊर्फ साहित्यभूषण अण्णाभाऊ साठे यांचा जीवनप्रवास हा प्रत्येक पिढीसाठी प्रेरणादायी आहे. तांत्रिकदृष्ट्या अशिक्षित असलेल्या अण्णाभाऊ साठे यांनी लोकवाङमय, कथा, नाट्य, लोकनात्य, कादंबऱ्या, चित्रपट, पोवाडे, लावण्या, वग, गवळण, प्रवास वर्णन असे सर्वच प्रकार सशक्त व समृद्ध केले. तमाशा या कलेला लोकनाट्याची प्रतिष्ठा मिळवून देण्याचं श्रेय अण्णाभाऊंना दिले जाते. पोवाडे, लावण्या, गीतं, पदं या काव्यप्रकारांचा त्यांनी सामान्य कष्टकरी जनतेत विचारांच्या प्रचारासाठी वापर केला. स्वातंत्र्यपूर्व आणि स्वातंत्र्यानंतरच्या काळात राजकीय प्रश्नांविषयी महाराष्ट्रात त्यांनी मोठी जागृती केली. त्यात संयुक्त महाराष्ट्र चळवळ, गोवा मुक्ती संग्राम या चळवळींमध्ये त्यांनी शाहिरीतून दिलेले योगदान महत्त्वाचे आहे. अण्णाभाऊ साठे यांनी मराठी भाषेत ३५ कादंबऱ्या लिहिल्या. त्यांच्या फकिरा या कादंबरीला १९६१ मध्ये राज्य सरकारच्या उत्कृष्ट कादंबरीचा पुरस्कार मिळाला. त्यांच्या लघु कथांचा संग्रहाची संख्या १५ आहे. ज्या बऱ्याच भारतीय भाषांमध्ये आणि २७ अन्य भाषांमध्ये भाषांतरित केल्या गेल्या आहेत. कादंबरी आणि लघुकथा यांच्याव्यतिरिक्त त्यांनी नाटक, रशियातील भ्रमंती, १२ पटकथा आणि मराठी पोवाडा शैलीतील 10 गाणी लिहिली आहेत. साहित्यासोबत बुलबुल, बासरी, हार्मोनियम अशी वाद्येही ते वाजवीत. दांडपट्टा फिरवीत. शिवाय स्वतःच्या लिखाणाव्यतिरिक्त त्यांनी नवयुग, युगांतर आणि आचार्य अत्रेंच्या मराठा वर्तमानपत्रातून अनेक लेख व पुस्तकांची परीक्षणे लिहिली. एकूणच शाळेत एकही वर्ग न शिकलेल्या अण्णाभाऊ साठे यांनी आपल्या लेखणीच्या जोरावर समाजाला परिवर्तनशील वाट दाखविण्याचे कार्य केल्याची भावना ॲड. धर्मपाल मेश्राम यांनी व्यक्त केली.
