नागपूर :- नागपूर परिसरातील व विशेषत: उत्तर नागपूरच्या सर्वसामान्यांना वैद्यकीय सुविधा मिळण्यासाठी 2014 पासून प्रलंबित असलेल्या डॉक्टर आंबेडकर रुग्णालय व अनुसंधान केंद्राचे (सुपर स्पेशालिटी) बांधकाम विनाविलंब सुरू करावे अशी मागणी काल बसपाचे प्रदेश मीडिया प्रभारी उत्तम शेवडे व जिल्हाध्यक्ष योगेश लांजेवार यांच्या नेतृत्वातील बसपाच्या शिष्टमंडळाने निवासी उपजिल्हाधिकारी अनुप खांडे ह्यांच्या माध्यमातून मुख्यमंत्र्याकडे निवेदनाद्वारे केली.
उत्तर नागपूरातील इंदोरा येथे 2005 पासून रुग्णालय व ओपीडी सुरू आहे. रुग्णालयात येणाऱ्या रुग्णांची संख्या व आर्थिक स्थिती पाहून 2014 रोजी महाराष्ट्र सरकारने या रुग्णालयाला 8 मजल्याची इमारत बांधून त्यात 615 घाटांची व्यवस्था करण्याचे निश्चित केले व त्यासाठी 1165 कोटी रुपयांचा निधी सुद्धा मंजूर केला होता. परंतु या सरकारने हे रुग्णालय व तो निधी पळविण्याचा प्रयत्न केला. त्यावेळी फुले शाहू आंबेडकरी जनतेने या सरकार विरुद्ध बंड पुकारून एक महिना आंदोलन चालविले होते. त्या आंदोलनात बसपाचा व त्यांच्या नगरसेवकांचा फार मोठा रोल होता.
या रुग्णालयात 17 विशेष व 11 सुपर स्पेशालिटीचे विभाग प्रस्तावित आहेत. प्रलंबित बांधकाम विनाविलंब सुरू करावे ह्यासाठी काल बसपा नेते उत्तम शेवडे व योगेश लांजेवार यांच्या दिशानिर्देशात राज्याच्या मुख्यमंत्र्यांना जिल्हाधिकाऱ्यांच्या माध्यमातून एक निवेदन दिले. या रुग्णालयाचे वैशिष्ट्य असे की हे रुग्णालय इंदिरा गांधी शासकीय वैद्यकीय रुग्णालय व कॉलेज शी संबंधित असून यासाठी कामठी रोडवर सुरू असलेल्या रुग्णालयाच्या ठिकाणी 15 एकड पेक्षा जागा उपलब्ध आहे जिथे अत्याधुनिक रुग्णालय उभारल्या जाणार आहे.
शिष्टमंडळात माजी जिल्हाध्यक्ष राजकुमार बोरकर, चंद्रशेखर कांबळे, उमेश मेश्राम, सुनील बारमाटे, तारा गौरखेडे, भदंत डॉ धम्मोदय, अनिल मेश्राम, राजेंद्र सुखदेवे, सावलदास गजभिये, अजय उके, शत्रुधन धनविजय आदींचा समावेश होता.