नागपूर :- उत्तरायणाच्या सुरुवातीच्या रथ सप्तमी दिवसाचे अनन्य साधारण महत्व मंडळाच्या योग साधकांना आहे. जगपालक सूर्य नारायणाचे महत्व सनातन हिंदू धर्मात पुरातन काळापासून आहे आणि योगाभ्यासात सूर्य नमस्कारांचे महत्व मंडळाचे दैवत प. पू. जनार्दन स्वामींनी अधोरेखित करून अत्यंत शास्त्र शुद्ध पद्धतीने सूर्य नमस्कार कसे घालवेत याचे सविस्तर शास्त्रीय वर्णन एका छोट्याश्या चार्ट मध्ये बसवून तो अत्यंत लोकप्रिय केला आहे. ह्या शिवाय सूर्यनमस्कारांमध्ये भुजान्वासन ह्या आसनाचा समवेश करून वयस्कही न थकता 12 नमस्कार घालू शकतील याची सोय केली.
दिनांक 28 जानेवारी रोजी सर्व योगकेंद्रांचे साधक सिव्हिल लाईन्स येथील चिटनवीस सेंटरच्या योग केंद्राच्या भव्य प्रांगणात सकाळी 6 पासून रथसप्तमी निमित्त सूर्यनमस्कार घालून सूर्यदेवतेला आदरांजली वाहण्यासाठी जमू लागले. ठीक 6.54 ला सूर्योदयाला उपस्थितांकडून शास्त्रशुद्ध व समंत्र 12 सूर्य नमस्कार करवून घेतल्या गेले. त्याचवेळी 70 साधकांनीही सांघिक रीत्या एका विवक्षित जागेत 144 नमस्कार घालण्यास सुरुवात केली.
सूर्यनमस्कार झाल्यानंतर श्याम देशपांडे आणि नमिता बांगरे यांनी अत्यंत सुरेल स्वरात आदित्य हृदय स्तोत्र गायले. त्यानंतर कार्यक्रमाचे प्रमुख पाहुणे दीपक खीरवाडकर, संचालक दक्षिण मध्य सांस्कृतिक केंद्र यांनी सर्व साधकांचे अभिनंदन करून मंडळाच्या त्यांच्या केंद्रातही चालू असलेल्या योगवर्गाची माहिती दिली. मंडळाचे अध्यक्ष खांडवे गुरुजींनी ओजस्वी शब्दात यथायोग्य उदबोधन करून साधकांचे कौतुक केले. तिळ गुळाचा प्रसाद व दुधाचे वितरण होऊन कार्यक्रम समाप्त झाला.
