नागपूर : नागपूर महानगरपालिका हद्दीतील नागरिकांना मालमत्ता कराचा भरणा करण्यासाठी शनिवार, रविवार आणि शासकीय सुट्टीच्या दिवशी सुद्धा मनपा मुख्यालयासह दहाही झोन कार्यालयातील मालमत्ता कर संकलन केंद्र सुरू राहणार आहेत. कर संकलनाच्या दृष्टीने मनपा आयुक्त तथा प्रशासक राधाकृष्णन बी. यांच्या निर्देशानुसार उपायुक्त (महसूल) मिलींद मेश्राम यांनी निर्णयाचे परिपत्रक जारी केले आहे.
आर्थिक वर्ष २०२२-२०२३ या वर्षात दिलेले उद्दिष्ट पूर्ण करण्याकरीता तसेच मालमत्ता कर धारकांना कराचा भरणा सोईचे व्हावे म्हणून ४ फेब्रुवारी २०२३ पासून ३१ मार्च २०२३ पर्यंत प्रत्येक शनिवार व रविवार तसेच शासकीय सुट्टीच्या दिवशीही (दिनांक ७ मार्च, २०२३ धुलिवंदन वगळुन ) दहाही झोन कार्यालयातील मालमत्ता कर संकलन केंद्र व सिव्हील कार्यालय मालमत्ता कर संकलन केंद्र सुरू ठेवण्यात येणार आहेत. नागरिकांनी या व्यवस्थेचा लाभ घेउन मालमत्ता कर भरावा, असे आवाहन मनपातर्फे करण्यात आले आहे.
