यवतमाळ :- राष्ट्रीय स्पर्धेसाठी राज्य व्हॉलीबॉल संघाची निवड करण्यासाठी दि.26 डिसेंबर रोजी निवड चाचणीचे आयोजन करण्यात आले आहे. पात्र खेळाडूंनी चाचणीस उपस्थित राहण्याचे आवाहन करण्यात आले आहे.
राष्ट्रीय स्तरावर व्हॉलीबॉल या खेळप्रकारातील अधिकृत एकविध खेळ संघटना कार्यरत नसल्याने भारतातील व्हॉलीबॉल खेळाच्या प्रसार व प्रचाराचे काम सुरळीत सुरु रहावे यासाठी इंडियन ऑलिम्पिक असोसिएशनद्वारा अँडहॉक समितीची नियुक्ती करण्यात आली आहे.
अँडहॉक कमिटी व्हॉलीबॉल फेडरेशन ऑफ इंडीया यांच्याद्वारा दि.७ ते १३ जानेवारी या कालावधीत जयपूर (राजस्थान) या ठिकाणी वरीष्ठ गटाच्या राष्ट्रीय अजिंक्यपद स्पर्धेचे आयोजन करण्यात येणार आहे. प्रस्तावित राष्ट्रीय स्पर्धेसाठी राज्य संघाची निवड करण्याची जबाबदारी आयोजन समितीस देण्यात आली आहे. त्यानुसार निवड चाचणीचा कार्यक्रम निश्चित करण्यात आला आहे.
निवड चाचणी चंद्रशेखर आगाशे शारीरिक शिक्षण महाविद्यालय, गुलटेकडी, पुणे येथे होणार आहे. राष्ट्रीय स्पर्धेसाठी पुरुष व महिला राज्य संघाची निवड चाचणी दि.२६ डिसेंबर रोजी सकाळी ८ वाजता होईल. निवड चाचणी दरम्यान निवास व भोजनाची व्यवस्था खेळाडूंनी स्वतः करायची आहे. व्हॉलीबॉल खेळाच्या पुरुष, महिला खेळाडूंना चाचणीकरिता उपस्थित राहण्याचे आवाहन जिल्हा क्रीडा अधिकारी यांनी केले आहे.
