नागपूर :- येथील शिवाजी नगर जिमखानाच्या सिया देवधरची बास्केटबॉल फेडरेशन ऑफ इंडिया (बीएफआय) शिष्यवृत्तीसाठी महिलांच्या “अ” श्रेणीतील भारतातील शीर्ष २० खेळाडूंमध्ये निवड झाली आहे. या शिष्यवृत्तीत प्रत्येक महिन्याला उच्च श्रेणीतील खेळाडूंना ₹७५,००० ची आर्थिक मदत दिली जाईल. ज्यासाठी बीएफआयने वार्षिक ₹३.६ कोटींचा निधी राखून ठेवला आहे. महाराष्ट्रातून या श्रेणीत निवड झालेली सिया ही एकमेव खेळाडू आहे, आणि तिची निवड गेल्या चार वर्षांतील राष्ट्रीय आणि आंतरराष्ट्रीय स्पर्धांमधील तिच्या प्रभावी कामगिरीवर आधारित आहे. महिलांच्या “अ” श्रेणीत सिया व्यतिरिक्त ६ खेळाडू भारतीय रेल्वेतून, ४ तामिळनाडूतून, ५ केरळमधून, २ पंजाबमधून आणि दिल्ली व कर्नाटक येथून प्रत्येकी १ खेळाडूंचा समावेश आहे.
श्रीश व स्वाती देवधर यांची २१ वर्षीय कन्या सिया नागपूरच्या धरमपेठ परिसरात राहते आणि नुकत्याच चीनमधील हांगझोऊ येथे पार पडलेल्या आशियाई क्रीडा स्पर्धेत तिने सहभाग घेतला आहे. ती एकमेव भारतीय खेळाडू आहे जिने एनबीए अकादमी इंडिया महिला कॅम्पमध्ये तिन्हीवेळा सहभाग घेतला आहे, आणि तिन्ही वेळा पुरस्कार प्राप्त केला आहे. शिवाजी नगर जिमखानामध्ये ती शिवछत्रपती पुरस्कार विजेते आणि महा बास्केटबॉल असोसिएशनचे सचिव शत्रुघ्न गोखले आणि प्रशिक्षक विनय चिकाटे यांच्या मार्गदर्शनाखाली प्रशिक्षण घेत आहे.
कोच गोखले यांनी बीएफआयच्या या ऐतिहासिक उपक्रमाचे कौतुक केले आणि भारतीय क्रीडा महासंघांमध्ये असा उपक्रम पहिल्यांदाच राबवला जात असल्याचे नमूद केले. खेळाडूंच्या विकासासाठी बीएफआय अध्यक्ष अर्जुन आढाव आणि सरचिटणीस कुलविंदर सिंग गिल यांच्या प्रयत्नांचे त्यांनी आभार मानले. त्यांनी सियाचे अभिनंदन केले आणि लवकरच बीएफआय “ब” आणि “क” श्रेणीतील खेळाडूंसाठी मासिक मानधन सुरू करणार असल्याची माहिती दिली.
