कोरोनाविरुद्धच्या लढ्यात नागरिकांच्या व्यापक आरोग्य हितासाठी चंद्रपूर शहर महानगरपालिकेने कठोर पाऊल उचलले आहे. प्रशासनाने केलेल्या सूचनेवरून मनपाच्या कर्मचाऱ्यांनी आज 10 डिसेंबर रोजी गिरणार चौक आणि बंगाली कॅम्प चौकात वाहनधारकांना थांबवून लसीकरण आणि मास्क बाबत विचारपूस केली. या दरम्यान ज्या नागरिकांनी अद्याप लस घेतली नव्हती, अशांना आरोग्य विभागाच्या पथकामार्फत कोविड लसीकरण देखील करण्यात आले.
शहरातील १०० टक्के नागरिकांचे लसीकरण करण्यासाठी महानगरपालिकेच्या माध्यमातून विविध उपक्रम राबविण्यात येत आहेत. लसीकरण आपल्या दारी, लस घ्या आणि खरेदीत मिळवा सवलत, धार्मिक प्रार्थनास्थळी लसीकरण मोहीम, लस नाही तर ऑटोत प्रवेश नाही, दुकानांवर लाल स्टिकर मोहीम आदी विविध योजना राबविण्यात आल्या. या माध्यमातून लसीकरणाची टक्केवारी वाढविण्यात मदत झाली. चंद्रपूर शहरात आतापर्यंत ९४ टक्के नागरिकांनी लसीची पहिली मात्रा घेतली असून, पुढील १० दिवसात १०० टक्के उद्दिष्ट पूर्ण करण्यासाठी मनपाने मोहीम हाती घेतली आहे.