संदीप जोशी यांच्या उपस्थितीत मनपा, जिल्हाधिकारी, नागपूर मेट्रो रिजनची बैठक
नागपूर :- क्रेडाई नागपूर मेट्रोच्या संदर्भातील विविध समस्यांच्या अनुषंगाने नागपूर महानगरपालिकेमध्ये मंगळवारी (ता.९) मनपा, जिल्हाधिकारी कार्यालय, नागपूर मेट्रो रिजन यांची संयुक्त बैठक घेण्यात आली.
नागपूर महानगरपालिकेच्या छत्रपती शिवाजी महाराज प्रशासकीय इमारतीमधील आयुक्त सभागृहामध्ये ही बैठक पार पडली. उपमुख्यमंत्री देवेंद्र फडणवीस यांच्या नागपूर कार्यालयाचे मानद सचिव माजी महापौर संदीप जोशी यांनी तिनही विभागांकडून यावेळी आढावा घेतला. बैठकीत मनपा आयुक्त तथा प्रशासक राधाकृष्णन बी, जिल्हाधिकारी डॉ. विपीन इटनकर, नागपूर सुधार प्रन्यासचे सभापती मनोजकुमार सुर्यवंशी, अति. जिल्हाधिकारी आशा पठाण, सुप्रिया थुल, गौरव अग्रवाल, तेजिंदरसिंग रेणू यांच्यासह विविध विभागांचे अधिकारी उपस्थित होते.
महाराष्ट्र राज्याचे उपमुख्यमंत्री देवेंद्र फडणवीस यांनी क्रेडाई मेट्रोच्या कार्यक्रमामध्ये नागपूर महानगरपालिका, नागपूर जिल्हाधिकारी व नागपूर मेट्रो रिजन यांची संयुक्त बैठक घेऊन त्यांनी प्रस्ताव पाठवावे, अशी सूचना केली होती. उपमुख्यमंत्र्यांच्या सूचनेनुसार त्यांच्या नागपूर कार्यालयाचे मानद सचिव संदीप जोशी यांनी तिनही संस्थांची बैठक घेतली. बैठकीमध्ये क्रेडाई मेट्रोच्या कार्यात येणा-या अडचणींच्या संदर्भातील विविध विषयांवर चर्चा करण्यात आली. चर्चेअंती विषयाच्या अनुषंगाने संपूर्ण प्रस्ताव तयार करून महाराष्ट्र शासन आणि प्रशासनाकडे पाठविण्याची निश्चिती करण्यात आली.