नागपूर :- आजच्या युगात महिला प्रत्येक क्षेत्रात प्रगती करीत असून ग्रामीण भागातील महिला शेती करून आपले आणि पर्यायाने कुटुंबाचा एक मुख्य आधार म्हणून उदयास येत आहेत. त्या करीता पशुसखीच्या क्षमता बांधणीचा उत्कृष्ट असा उपक्रम माविम च्या सोबतीने राबवित असून यात प्रत्येक गावात एक प्रशिक्षित पशुसखी तयार होईल आणि पशुसंवर्धन आणि विशेषतः शेळी पालनातून ग्रामीण विकास साध्य केला जाईल, असे प्रतिपादन महाराष्ट्र पशु व मत्स्य विज्ञान विद्यापीठाचे संचालक(विस्तार शिक्षण) प्रा. डॉ. अनिल भिकाने यांनी केले.
ते महाराष्ट्र पशु व मत्स्य विज्ञान विद्यापीठ अंतर्गत कृषी विज्ञान केंद्र, दुधबर्डी आणि महिला आर्थिक विकास महामंडळ, मुंबई यांच्या संयुक्त विद्यमाने आयोजित ‘शेळीपालन प्रशिक्षण’ दि. 4 ते 13 ऑक्टोबर दरम्यान संपन्न झालेल्या कार्यक्रमाच्या समारोप प्रसंगी प्रमुख अतिथी म्हणून बोलत होते.
कार्यक्रमाचे आयोजन वरिष्ठ वैज्ञानिक डॉ. सारीपुत लांडगे आणि प्रमुख, केव्हीके, दुधबर्डी यांच्या अधक्ष्यतेखली संपन झाले. या प्रसंगी विशेष अतिथी म्हणून राजू इंगळे, माविमचे विभागीय सनियंत्रण अधिकारी ललिता दारोकर,नागपूर पशुवैद्यकीय महाविद्यालयाच्या विभाग प्रमुख डॉ. वैशाली बांठिया, विषय विशेषज्ञ डॉ.गजानन आंभोरे उपस्थित होते.
यावेळी डॉ. सारीपुत लांडगे यांनी समारोपीय कार्यक्रमाचे प्रास्ताविकामध्ये कृषी विज्ञान केंद्राने आयोजित केलेल्या दहा दिवसीय निवासी प्रशिक्षणामध्ये बौद्धिक आणि प्रक्षेत्र भेटीमार्फत पशूसखींना उत्तम असे प्रशिक्षण दिले, असे सांगितले. या प्रशिक्षणासाठी नागपूर पशूवैद्यकीय महाविद्यालय येथील प्राध्यापक गण यांनी आपला अमूल्य वेळ देऊन महिलांना बौद्धिक आणि प्रात्यक्षिक असे प्रशिक्षण दिले. कृषी विज्ञान केंद्र हे नेहमीच आधुनिक तंत्रज्ञान आत्मसात करून महिलांना प्रशिक्षित आणि स्वयंपूर्ण करण्यासाठी म्हणून पशुसखी हा उपक्रम माविमच्या सोबत राबवीत आहोत असे डॉ. सारीपुत लांडगे यांनी सांगितले. सहभागी प्रशिक्षणार्थी मधून योगिता सोमनाथे, संघमित्रा अंबादे, जयश्री वाहने, वैशाली बागडे यांनी अभिप्रायात कृषी विज्ञान केंद्राने माविमसोबत घेत असलेले पशुसखी हा उपक्रम अत्यंत महत्वाचा पायंडा असून महिलांचा विकास साधण्यासाठी असे प्रशिक्षण कृषी विज्ञान केंद्रामार्फत मिळत राहावे, अशी अपेक्षा व्यक्त केली.
कार्यक्रमाचे सूत्रसंचालन कृषी विज्ञान केंद्राच्या विषय विशेषज्ञ डॉ. श्वेता मुळे यांनी केले. तर आभार नागपूर पशुवैद्यकीय महाविद्यालयाच्या विभाग प्रमुख डॉ. वैशाली बांठीया यांनी मानले. पशुसखी ‘शेळीपालन’ प्रशिक्षणाला एकूण 30 प्रशिक्षणार्थी उपस्थित होत्या.
