मुंबई :- अनुसूचित जातीतील 761 पीएचडी संशोधक विद्यार्थ्यांना 2022 च्या नोंदणी दिनांक पासून बार्टी द्वारे सरसकट फेलोशिप मिळावी यासाठी मागील सहा महिन्यापासून पुणे व मुंबई येथे धरणे, निदर्शने, उपोषण आदि प्रकारचे आंदोलन सुरू आहे. पुण्यात बार्टी कार्यालयापुढे शंभर दिवस आंदोलन चालले. तर मागील पंधरा दिवसापासून मुंबईच्या आझाद मैदानावर आंदोलन सुरू आहे.
या आंदोलनात आत्तापर्यंत राज्यातील शेकडो विद्यार्थ्यांनी सहभाग नोंदवला आहे. परंतु महाराष्ट्र शासनाने याकडे जातीयवादी भूमिकेतून हेतूता दुर्लक्ष केलेले आहे. सरकारच्या या अडेलतट्टू भूमिकेच्या निषेधार्थ आझाद मैदान येथे बेमुदत धरने, निदर्शने व आंदोलने सुरू आहेत.
आज नागपूर वरून उत्तम शेवडे, लालदेव नंदेश्वर, संदीप शंभरकर, महानागरत्न, पल्लवी गायकवाड आदि विद्यार्थी विदर्भ एक्सप्रेस ने मुंबईकरिता रवाना होत आहेत अशी माहिती या आंदोलनातील पीएचडी संशोधक विद्यार्थी उत्तम शेवडे यांनी दिली आहे.
