– सुट्टीच्या दिवशीही सुरु राहणार वीजबिल भरणा केंद्र
नागपूर/वर्धा :- आर्थिक वर्षाच्या अखेरीस वीजबिल थकबाकी कमी करण्यासाठी थकबाकीदारांचा वीजपुरवठा खंडित करण्याची धडक मोहीम महावितरणच्या नागपूर परिमंडलात सुरू आहे. सुट्टीच्या दिवशीही ही मोहीम सुरू राहणार असून संभाव्य गैरसोय टाळण्यासाठी थकबाकीचा त्वरित भरणा करण्याचे आवाहन महावितरणने केले आहे.
अधिकृत वीजबिल भरणा केंद्रासह महावितरणचे मोबाईल ॲप, संकेतस्थळ, महा पॉवर पे वॉलेट तसेच विविध पेमेंट गेटवेचा वापर करून घरबसल्या विजबिलाचा ऑनलाईन भरणा करण्याची सुविधाही ग्राहकांना उपलब्ध आहे. ग्राहकांनी अखंडित वीज सेवेसाठी उपलब्ध सुविधांचा उपयोग करून चालू व थकीत वीजबिलाचा भरणा करून सहकार्य करावे, असे आवाहन महावितरणने केले आहे.
ग्राहकांना वीजबिलाचा भरणा करणे अधिक सुलभ व्हावे, यासाठी मार्च अखेरपर्यंत सुट्टीच्या दिवशीही वीजबिल भरणा केंद्र सुरु राहणार आहेत. त्यानुसार महावितरणच्या नागपूर परिमंडलांतर्गत सर्व अधिकृत वीजबिल भरणा केंद्र शनिवार, रविवार आणि सोमवार या सुट्टीच्या दिवशी सुरु राहतील. उपलब्ध सुविधेचा लाभ घेऊन वीज ग्राहकांनी आपल्या चालू वीजबिलासह थकबाकीचा भरणा करून सहकार्य करण्याचे आवाहन महावितरणकडून करण्यात येत आहे.
वरिष्ठ अधिकारी वसुलीसाठी ‘ऑनफ़िल्ड’
वीजबिलापोटी थकबाकी असलेल्या ग्राहकांची प्रत्यक्ष भेट घेत, त्यांना वीजबिलांचा भरणा त्वरित करण्याचे आवाहनासाठी महावितरणच्या, नागपूर परिमंडलाचे मुख्य अभियंता दिलीप दोडके, अधिक्षक अभियंता अमित परांजपे, संजय वाकडे आणि स्मिता पारखी यांच्यासह प्रत्येक विभागाचे कार्यकारी अभियंता आपल्या अधिनस्थ कर्मचा-यांसमवेत थकबाकीदार ग्राहकांची प्रत्यक्ष भेट घेत ग्राहकांसोबत चर्चा करून थकबाकीसह चालू वीज बिलांचा भरणा करण्याचे आवाहन करीत आहेत. विजबिल वसुली मोहीम अधिक प्रभावी करून जास्तीतजास्त थकबाकीची वसुली करण्याचे दिलीप दोडके यांनी महावितरणच्या संबंधित अधिकारी व कर्मचा-यांना केले.
महावितरण ॲक्शन मोड वर
महावितरणची सर्व अधिकृत वीज बिल भरणा केंद्रे केंद्र शनिवार, रविवार आणि सोमवार या सुटीच्या दिवशी सुरु राहणार असल्याने उपलब्ध सुविधेचा लाभ घेऊन वीज ग्राहकांनी आपल्या चालू वीजबिलासह थकबाकीचा भरणा करण्याचे आवाहन महावितरणने केले असून थकबाकीदार ग्राहकांचा वीजपुरवठा खंडित करण्याचे निर्देश सर्व संबंधितांना देण्यात आले आहे.
फ़ोटो ओळ – आर्वीर येथील थकबाकीदार वीज ग्राहकांना बील भरणा करण्याचे आवाहन करतांना मुख्य अभियंता दिलीप दोडके, सोबत अधीक्षक अभियंता स्मिता पारखी.
