यवतमाळ :- महाराष्ट्र विधानसभा निवडणुकीच्या कार्यक्रमाची नुकतीच घोषणा झाली आहे. ही निवडणूक पारदर्शकपणे पार पाडण्यासोबतच यादरम्यान काळ्या पैशाचा वापर रोखण्यासाठी प्राप्तीकर विभागाने टोल फ्री तसेच व्हॅाट्सअॅप क्रमांकासह ई-मेल पत्ता जारी केला असून अशा पैशाचा वापर होत असल्सास त्यावर माहिती देण्याचे आवाहन करण्यात आले आहे.
निवडणुकीच्या अनुषंगाने प्रशासकीय यंत्रणा सज्ज झाल्या असून पारदर्शक पद्धतीने निवडणुका पार पडाव्यात यासाठी प्रयत्न करण्यात येत आहेत. निवडणुकीच्या पार्श्वभूमीवर आयकर विभागही तयार असून दरम्यानच्या कालावधीत काळ्या पैशांच्या व्यवहारावर बारीक नजर ठेवण्यात येणार आहे. निवडणुकीत वापरला जाणारा काळा पैसा, रोख रकमेचे वाटप, रोख रकमेची हालचाल आदी संशयास्पद गोष्टी नजरेस पडल्यास नागरिकांनी थेट आयकर विभागाशी संपर्क साधावा. संबंधित माहिती देणाऱ्या व्यक्तीची ओळख ही गुप्त ठेवण्यात येणार आहे.
नागरिकांनी माहिती देण्यासाठी 1800-233-0355 किंवा 1800-233-0356 या टोल-फ्री क्रमांकावर संपर्क साधावा. एखाद्या घटनेची छायाचित्रे, व्हिडिओ ईत्यादी माहिती 94033 90980 हा व्हॉट्सअॅप क्रमांकावर पाठवावीत. सदर मजकूर nagpur.addldit.inv@incometax.gov.in किंवा nashik.addldit.inv@incometax.gov.in या मेल आयडीवर मेलही करता येईल, असे आयकर विभागाचे नागपूर येथील उप आयकर निदेशक (अन्वेषण) अनिल खडसे यांनी कळविले आहे.