– शेतकरी नोंदणीसाठी मोबाईल ॲप
यवतमाळ :- खरीप पणन हंगामांतर्गत राज्यात किमान आधारभूत किंमत खरेदी योजनेअंतर्गत ज्वारी, मका व रागी या भरडधान्य खरेदीसाठी जिल्ह्यातील महागाव, पांढरकवडा, झरी जामणी, पुसद व आर्णी हे खरेदी केंद्र असून नव्याने राळेगांव व कळंब या 2 खरेदी केंद्रांना मंजुरी मिळालेली आहे. या सात तालुक्यात खरेदी केंद्र सुरु करण्यात आले आहे. यासाठी शेतकऱ्यांची ऑनलाईन नोंदणी दि.31 मे पर्यंत सुरु राहणार आहे.
खरेदी केंद्रांमध्ये तालुका खरेदी विक्री समिती महागांव, तालुका खरेदी विक्री समिती पांढरकवडा, झरी तालुक्यात बळीराजा फळे फुले भाजीपाला कृषी उत्पादन पणन व प्रक्रिया सहकारी संस्था पाटण, पुसद तालुक्यात किसान मार्केट यार्ड शेलु (बु), पुसद, आर्णी तालुक्यात शेतकरी कृषी खाजगी बाजार दत्तरामपुर, आर्णी, राळेगांव तालुक्यात तालुका खरेदी विक्री समिती राळेगांव, कळंब तालुक्यात तालुका खरेदी विक्री समिती कळंब या केंद्रांचा समावेश आहे.
शेतकऱ्यांनी नोंदणी करतांना या हंगामापासून ज्यांचा सातबारा आहे, त्याच शेतकऱ्यांचा प्रत्यक्ष लाईव्ह फोटो अपलोड करणे आवश्यक आहे. त्याशिवाय नोंदणी पूर्ण होणार नाही. शेतकरी नोंदणी मोबाईल ॲपद्वारे होत असून लाईव्ह फोटो देखील या अँपद्वारे अपलोड करता येणार आहे. ज्या शेतकऱ्यांना शेतमालाची विक्री करावयाची आहे, त्याच शेतकऱ्यांनी लाईव्ह फोटो अपलोड करण्यासाठी मोबाईल ॲपचा वापर करुन नोंदणी करावी.
शेतकऱ्यांनी नोंदणीसाठी आपल्या तालुक्यातील खरेदी केंद्रावर स्वत: हजर राहून किंवा स्वत: मोबाईल ॲपद्वारे लाईव्ह फोटो अपलोड करावा. ज्वारी, मका व रागी हे भरडधान्य खरेदीसाठी शेतकऱ्यांची ऑनलाईन नोंदणी दि.31 मे पर्यंत तर खरेदी दि.30 जूनपर्यंत करण्यात येणार आहे. शेतकऱ्यांनी भरडधान्य खरेदीसाठी नोंदणी करण्याचे आवाहन जिल्हा पणन अधिकारी अर्चना माळवे यांनी केले आहे.