– कार्डीफध्ये १० सप्टेंबरपासून परिषद : ‘ओपन जस्टीस टूडे’
नागपूर :- यूनायटेड किंगडम मधील कार्डीफ येथे होणाऱ्या कॉमनवेल्थ मॅजिस्ट्रेट आणि जजेस असोसिएशन (सीएमजीए) परिषदेमध्ये सर्वोच्च न्यायालयाचे ज्येष्ठ न्यायमूर्ती भूषण गवई भारतीय शिष्टमंडळाचे नेतृत्व करणार आहेत. १० सप्टेंबरपासून पाच दिवसीय सीएमजीए परिषदेला सुरूवात होईल.
‘ओपन जस्टीस टूडे’ अशी सीएमजीए परिषदेची संकल्पना आहे. सीएमजीए इंग्लंड आणि वेल्सच्या लॅटिमर हाउसच्या मार्गदर्शक तत्त्वांना २५ वर्षे पूर्ण झाल्यानिमित्त या परिषदेचे आयोजन करण्यात आले आहे. या परिषदेमध्ये खुले न्यायालय, न्यायालयीन अहवालातील पारदर्शकता, मानवी हक्क यांच्यासह इतर अनेक विषयांवर चर्चा करण्यात येणार आहे. परिषदेदरम्यान न्या. भूषण गवई हे सरन्यायाधीशांच्या आणि कौन्सिलच्या बैठकीतही सहभागी होतील. ते महत्वाच्या सत्रात मुख्य भाषण करणार आहेत. या परिषदेत कॉमनवेल्थ देशांचे अनेक विद्यमान आणि माजी सर्वोच्च न्यायाधीश सहभागी होत आहेत.
या परिषदेचा उद्देश कॉमनवेल्थ देशांमधील न्यायिक स्वातंत्र्यांच्या मुद्यांकडे लक्ष वेधणे, या देशांमध्ये असलेल्या समस्यांकडे पाहण्याचा दृष्टिकोन बदलणे, दंडाधिकारी व न्यायाधीशांमध्ये अधिक जागरूकता निर्माण करणे, आंतरराष्ट्रीय करार आणि कायद्यांबद्दल अधिक जागरूकता निर्माण करणे आणि कायद्याच्या अधिकाधिक वापराचा विचार करणे, न्यायिक विकासासाठी कॉमनवेल्थ मॅजिस्ट्रेट आणि न्यायाधीशांच्या असोसिएशनमध्ये चांगले संबंध प्रस्थापित करणे हा आहे.