नागपूर : राज्याचे राज्यपाल भगत सिंह कोश्यारी हे तीन दिवसांच्या विदर्भ दौऱ्यावर येत असून मंगळवार, दिनांक 23 नोव्हेंबर रोजी दुपारी सव्वाचार वाजता नागपूर येथील डॉ. बाबासाहेब आंबेडकर आंतरराष्ट्रीय विमानतळावर राज्यपाल यांचे आगमन होईल व येथे मुक्काम राहील.
बुधवारी, (24 नोव्हेंबर) सकाळी नऊला राज्यपाल श्री. कोश्यारी हे अमरावतीकडे शासकीय वाहनाने प्रयाण करतील. अमरावती येथील श्री. शिवाजी शिक्षण संस्थेच्या प्रशासकीय इमारतीच्या उद्घाटन कार्यक्रमास उपस्थित राहिल्यानंतर राज्यपाल नांदगाव खंडेश्वर तालुक्यातील डॉ. पंजाबराव देशमुख यांच्या जन्मगाव पापळला भेट देतील. त्यानंतर पापळ येथून यवतमाळकडे प्रयाण करतील.
यवतमाळ जिल्ह्यातील निलोना येथील दिनदयाल प्रबोधिनीला राज्यपाल भेट देतील व यवतमाळ येथे मुक्काम करतील.
गुरुवारी, (25 नोव्हेंबर) सकाळी नऊला यवतमाळ येथील गोधनीरोडवरील प्रयास वन येथे राज्यपाल श्री. कोश्यारी यांच्या हस्ते वृक्षारोपण होईल. तसेच स्वर्गीय जवाहरलाल दर्डा यांच्या प्रेरणास्थळी आयोजित प्रार्थना व वृक्षारोपण कार्यक्रमास उपस्थित राहतील. त्यानंतर इंग्रजी माध्यम शाळेच्या नव्या इमारतीचे लोकार्पण व आरोग्य शिबिराचे उद्घाटन राज्यपाल श्री. कोश्यारी यांच्या हस्ते होईल. दुपारी पावणेतीन वाजता राज्यपालांचे यवतमाळ येथून नागपूर विमानतळावर आगमन होईल. दुपारी तीनला मुंबईकडे प्रयाण करतील.