नागपूर :- बाळासाहेब ठाकरे गोरेवाडा आंतराष्ट्रीय प्राणी उद्यान येथे रविवार 17 एप्रिल रोजी पहाटे चिंकी या मादी बिबटने २ बछड्यांना जन्म दिला तर सोमवारी सकाळी रुची या बिबट मादीने ३ बछड्यांना जन्म दिला. रुचीने ३ पिल्लांना स्विकारले असून ती त्यांचा व्यवस्थित संभाळ करत आहे.
रविवारी, चिंकीचे पहिल्या शावकाची प्रसूती सुरक्षित झाली, परंतू दुसरे शावक प्रसुती दरम्यान गर्भातच मृत पावले व या दरम्यान रक्तस्राव होऊन संसर्ग झाल्याने तिच्यावर उपचार सुरू आहेत. तिच्या पहिल्या पिल्लाला कृत्रिमरित्या संभाळले जात आहे. 
या बिबट्यांची प्रसूती व्यवस्थित होणेसाठी गोरेवाडा प्रशासनाकडून विशेष काळाजी घेण्यात आली होती. दोन्ही माद्यांना स्वतंत्र बाळंतगुफा तयार करुन त्यांच्यावर सीसीटिव्हीच्या माध्यमातून २४ तास लक्ष ठेवण्यात येत होते. त्यांच्या दैनंदीन आहारासोबत विशेष आयुर्वेदीक पोषक तत्वे माद्यांना नियमित देण्यात येत होते.
सदर प्रसुती दरम्यान प्राणिसंग्रहालय संचालक, एस. एस. भागवत, पशुवैद्यक डॉ. मयुर पावशे, अभिरक्षक दिपक सावंत आणि सहा. वनसंरक्षक सारिका खोत उपस्थित होते. चिंकीच्या उपचाराकरिता वन्यजीव संशोधन आणि प्रशिक्षण केंद्राचे पशुवैद्यक डॉ. सुजित कोलंगथ यांच्या मदतीने उपचार सुरु आहेत. चिंकीच्या प्रसुतीसाठी ऍनिमल किपर संतोष पायघन आणि राम नान्हे तर रुचीसाठी निलेश चिंतनवार आणि शैलेश गवळी यांनी विशेष मेहनत घेतली.
एफडीसीएम गोरेवाडा झू लि. चे अध्यक्ष विकास गुप्ता यांनी संपुर्ण टिमचे अभिनंदन केले आहे. या प्रक्रियेत वन विकास महामंडळाचे मुख्य महाव्यवस्थापक संजीव गौड आणि महाव्यवस्थापक ऋषिकेश रंजन यांनी मार्गदर्शन केले.
