• रुग्णालयात पोलीस अधिकारी, नागरिकांच्या भेटी
• पोलीस आयुक्तालयात आढावा बैठक
• नुकसानीचे तत्काळ पंचनामे सुरु
• सोशल मीडियावर करडी नजर
• सीसीटीव्ही फुटेजवरून तपासाला गती
•३४ पोलीस अधिकारी व शिपाई जखमी
नागपूर :- नागपूरच्या महाल भागात सोमवारी घडलेल्या हिंसक घटनेत जखमी झालेल्या नागरिक, त्यांचे कुटुंबीय व पोलिस अधिकाऱ्यांची रुग्णालयात जाऊन महसूलमंत्री व नागपूरचे पालकमंत्री चंद्रशेखर बावनकुळे यांनी भेट घेतली. जखमींना व त्यांच्या कुटुंबियांना धीर दिला.
तसेच, हिंसाचारग्रस्त भागातील नागरिकांनी पोलिस आयुक्त कार्यालयात बावनकुळे यांची भेट घेऊन निवेदने दिली. याचदरम्यान, पोलिस व प्रशासनाने घटनेदरम्यान व नंतर उचललेल्या कार्यवाहीची माहिती घेऊन, वरिष्ठ अधिकाऱ्यांना गुन्हेगारांना शोधून काढण्यासाठी मुलाहिजा ठेवू नका, सूत्रधाराच्या मुसक्या बांधा, असे स्पष्ट आदेश दिले. नागपूरकरांनी सौहार्द व शांततेसाठी प्रशासनाला सहकार्य करावे, असे आवाहन केले.
सोमवारच्या घटनेवर संपूर्ण लक्ष ठेवल्यानंतर आज पालकमंत्री बावनकुळे यांनी, पोलीस आयुक्त कार्यालयात वरिष्ठ अधिकाऱ्यांची भेट घेऊन परिस्थितीचा आढावा घेतला. बैठकीस पोलीस आयुक्त डॉ. रविंद्रकुमार सिंघल, जिल्हाधिकारी डॉ. विपीन इटनकर , महापालिका आयुक्त डॉ. अभिजीत चौधरी यांच्यासह वरिष्ठ अधिकारी उपस्थित होते.
पोलीस पूर्णपणे अ‍ॅक्शन मोडवर असून, हिंसक घटनेत जवळपास ३४ पोलीस अधिकारी व शिपाई जखमी झाले असून, ५ नागरिक जखमी झाले आहेत, त्यातील तिघांना डिस्चार्ज देण्यात आला आहे. घटनास्थळी ५५ वाहने जाळण्यात आली आहेत. खरं तर, सोशल मीडियावर चुकीच्या बातम्या पसरवल्या जात होत्या, त्यामुळे समाजात द्वेष निर्माण झाला, याबाबत त्यांनी आढावा घेतला.
पत्रकारांना त्यांनी सांगितले की, या घटनेला जे जबाबदार आहेत त्या समाजकंटकांना पोलीस लवकरच शोधून काढतील. सोशल मीडियावरून ज्यांनी वातावरण बिघडविण्याचे काम केले त्यांचा शोध महत्त्वाचा आहे. त्या सर्वांवर आमची करडी नजर आहे.
सी.सी.टि.व्ही.कॅमेरामध्ये जे फूटेच आहे ते तपासून घेतले जाईल असे त्यांनी सांगून कोणऱ्याही स्थितीत नागपूरच्या शांततेला यानंतर गालबोट लागणार नाही यासाठी सर्वांनी दक्षता घेतली पाहिजे. या घटनेत ज्यांचे नुकसान झाले आहे त्यांचे तत्काळ पंचनामे सुरु झाले आहेत.
रुग्णालयातील जखमींच्या भेटीनंतर पालकमंत्री बावनकुळे यांनी महाल भागातून आलेल्या नागरिकांची निवेदने स्वीकारली. आमदार प्रवीण दटके यावेळी उपस्थित होते. अनेकांनी घडलेला घटनाक्रम सांगून न्याय द्यावा असे आर्जव केले.
यावेळी बावनकुळे यांनी उपस्थिताना सांगितले की,नागपूर शहरात काल घडलेली दुर्दैवी घटना यापूर्वी कधीही पाहायला मिळाली नव्हती. मुख्यमंत्री श्री देवेंद्र फडणवीस कालपासून जिल्हा प्रशासन आणि पोलीस आयुक्तांशी संपर्क साधत होते. ही घटना वाढू नये आणि त्याचे दूरगामी परिणाम होऊ नयेत यासाठी त्यांनी सर्वतोपरी प्रयत्न केले आहेत. नागपूरसह राज्यात अन्यत्र अशा घटना घडणार नाही याची काळजी राज्य शासन घेत आहे.
• उपचाराबाबत हलगर्जी नको !
पालकमंत्री चंद्रशेखर बावनकुळे यांनी आढावा बैठकीनंतर न्यू इरा हॉस्पिटल येथे भेट देऊन जखमी पोलीस अधिकारी व नागरिकांची विचारपूस केली. त्यांच्यासमवेत आमदार प्रवीण प दटके, पोलीस आयुक्त रवींद्र सिंगल, जिल्हाधिकारी डॉ. विपीन इटनकर व वरिष्ठ अधिकारी उपस्थित होते. आमदार प्रविण दटके यांनी उपस्थित जखमी रुग्णांच्या नातेवाईकांशी पालकमंत्री बावनकुळे यांच्यासमवेत संवाद साधून दिला. उपचाराबाबत कोणतीही हलगर्जी होता कामा नये, अशी सूचना त्यांनी पडू नये हॉस्पिटल व्यवस्थापनाला केली.
