नागपूर : महाराष्ट्र शासनांतर्गत राष्ट्रीय सेवा योजना, उच्च व तंत्र शिक्षण विभाग आणि पुण्यश्लोक अहिल्याबाई होळकर सोलापूर विद्यापीठ, सोलापूर यांच्या संयुक्त विद्यमाने आयोजित ‘उत्कर्ष’ या राज्यस्तरीय सामाजिक व सांस्कृतिक स्पर्धा 2022-23 मध्ये कमला नेहरू महाविद्यालयातील एम.ए.भाग 1 संगीत विभागाचा विद्यार्थी आदित्य सावरकर याने या स्पर्धेत एकूण तीन पारितोषिक प्राप्त करून एका नव्या विक्रमाची नोंद आपल्या नावावर केली आहे.
‘उत्कर्ष’ या राज्यस्तरीय स्पर्धेमध्ये घेण्यात आलेल्या विविध स्पर्धांतर्गत झालेल्या भक्तीगीतामध्ये प्रथम पारितोषिक, समूहगीतामध्ये द्वितीय पारितोषिक तर लोकगीतामध्ये द्वितीय पारितोषिक प्राप्त करून आदित्य सावरकर या विद्यार्थ्यांने स्वतःबरोबरच महाविद्यालयाच्या यशात मानाचा तुरा रोवला आहे. त्याने प्राप्त केलेल्या या उत्तुंग यशाबद्दल अमर सेवा मंडळाच्या अध्यक्षा डॉ. सुहासिनी वंजारी, संस्थेचे सचिव तथा नागपूर विभाग पदवीधर मतदार संघाचे आमदार अँड. अभिजित वंजारी, संस्थेच्या कोषाध्यम डॉ.स्मिता वंजारी आणि महाविद्यालयाचे प्राचार्य डॉ.दिलीप बडवाईक यांनी आदित्य सावरकरचे कौतुक व अभिनंदन केले. संगीत विभागाच्या प्रमुख प्रा. प्रिती महाजन यांचे मार्गदर्शन आदित्य सावरकरला लाभले.
