यवतमाळ :- ज्या विद्यार्थ्यांनी कंबाईन्ड डिफेन्स सर्विसेस या परीक्षेकरीता अर्ज सादर केलेला आहे. अशा विद्यार्थ्यांकडून सीडीएस या परीक्षेची पुर्व तयारी करुन घेण्यासाठी नाशिक येथे विनामुल्य निवासी प्रशिक्षण देण्यात येणार आहे. या प्रशिक्षणाचा लाभ घेण्यासाठी संपर्क साधण्याचे आवाहन करण्यात आले आहे.
छात्रपुर्व प्रशिक्षण केंद्र, नाशिक रोड, नाशिक येथे महाराष्ट्र शासनातर्फे महाराष्ट्रातील स्थायी नवयुवक व नवयुवतींसाठी दि.5 मे ते 14 मे या कालावधीत सीडीएस कोर्स क्रमांक 61 चालविण्याचे आयोजन करण्यात आले आहे. या कोर्ससाठी प्रशिक्षणार्थींची निवास, भोजन आणि प्रशिक्षणाची निःशुल्क सोय करण्यात आली आहे.
जिल्ह्यातील इच्छुक व पात्र उमेदवारांनी सैन्यदलातील अधिकारी पदाची संधी उपभोगण्यासाठी जिल्हा सैनिक कल्याण कार्यालय, यवतमाळ येथे दि. 23 एप्रिल रोजी सकाळी ११.३० वाजता मुलाखतीस उपस्थित रहावे. मुलाखतीस येण्याआधी फेसबुक, वेब पेज डिपाट्मेंन्ट ऑफ सैनिक वेलफेअर, पुणे यावर सर्च करुन सीडीएस कोर्स क्रमांक 61 कोर्ससाठी दिलेले किंवा संबंधित जिल्हा सैनिक कल्याण कार्यालयाने प्रिंट दिलेले प्रवेशपत्र व त्यासोबत असलेली परिशिष्टांची प्रिंट घेऊन व ते पुर्ण भरुन सोबत घेऊन यावे.
अधिक माहितीसाठी प्रभारी अधिकारी, छात्रपूर्व प्रशिक्षण केंद्र, नाशिक रोड, नाशिक यांचा दुरध्वनी क्रमांक ०२५३-२४५०३२ येथे दुरध्वनीवर किंवा प्रत्यक्ष संपर्क करावा, असे जिल्हा सैनिक कल्याण अधिकारी यांनी कळविले आहे.
