नागपूर :- स्वच्छता हे आरोग्याचे महत्त्वाचे अंग आहे. संपूर्ण शहराची स्वच्छता राखणे हे घराची व परिसराची स्वच्छता राखण्या इतकेच महत्त्वाचे आहे. शहर स्वच्छतेची जबाबदारी नित्यनियमाने पार पाडणाऱ्या नागपूर महानगरपालिकेच्या स्वच्छता दूत अर्थात सफाई कर्मचाऱ्यांकरिता आरोग्य तपासणी शिबिरांचे आयोजन करण्यात आले.
नागपूर महानगरपालिकेच्या आरोग्य विभागाद्वारे “सफाई अपनाओ, बीमारी भगाओ” अभियांतर्गत मंगळवारी (ता:२७) घनकचरा व्यवस्थापन विभागाच्या सर्व स्वच्छता दुतांची आरोग्य तपासणी करण्यात आली.
मनपा आयुक्त तथा प्रशासक डॉ. अभिजीत चौधरी यांच्या निर्देशानुसार व अतिरिक्त आयुक्त आंचल गोयल यांच्या मार्गदर्शनात मनपाच्या दहाही झोन निहाय येणाऱ्या विविध नागरी प्राथमिक आरोग्य केंद्र येथे विशेष आरोग्य शिबिर घेण्यात आले. जवळपास सर्वच सफाई कर्मचाऱ्यांनी या शिबिराचा लाभ घेतला.
यात लक्ष्मीनगर झोन अंतर्गत सोमलवाडा युपीएचसी, धरमपेठ झोन अंतर्गत फुटाळा युपीएचसी, हनुमाननगर झोन अंतर्गत मानेवाडा युपीएचसी, धंतोली झोन अंतर्गत बाबुलखेडा युपीएचसी, नेहरू नगर झोन अंतर्गत नंदनवन युपीएचसी, गांधीबाग झोन अंतर्गत भालदार पुरा युपीएचसी, सतरंजीपुरा झोन अंतर्गत शांतीनगर युपीएचसी, लकडगंज झोन अंतर्गत पारडी युपीएचसी, आशीनगर झोन अंतर्गत शेंडे नगर युपीएचसी, मंगळवारी झोन अंतर्गत इंदोरा युपीएचसी येथे विशेष शिबिरांचे आयोजन करण्यात आले.