नागपूर ते शिर्डी समृद्धी महामार्गाची पाहणी करण्यासाठी प्रस्थान
नागपूर :- प्रधानमंत्री नरेंद्र मोदी यांचा ११ डिसेंबरचा हिंदूहदयसम्राट बाळासाहेब ठाकरे समृद्धी महामार्गाच्या उद्घाटन दौऱ्याच्या पार्श्वभूमीवर मुख्यमंत्री एकनाथ शिंदे यांचे आज सकाळी विशेष विमानाने नागपूर विमानतळावर आगमन झाले. दुपारी १२.४५ ला उपमुख्यमंत्री देवेंद्र फडणवीस यांच्यासमवेत ते नागपूर ते शिर्डी पर्यंत महामार्गाची पाहणी करण्यासाठी समृद्धी महामार्गाने रवाना झाले.
तत्पूर्वी, नागपूर विमानतळावर विभागीय आयुक्त विजयलक्ष्मी प्रसन्ना बिदरी, पोलीस आयुक्त अमितेश कुमार,महाराष्ट्र रस्ते विकास महामंडळाचे व्यवस्थापकीय संचालक राधेश्याम मोपलवार, जिल्हाधिकारी डॉ. विपीन इटनकर, नागपूर महानगरपालिका आयुक्त राधाकृष्णन बी., जिल्हा परिषदेच्या मुख्य कार्यकारी अधिकारी सौम्या शर्मा, अतिरिक्त पोलीस आयुक्त अश्वती दोरजे, विशेष पोलीस महानिरिक्षक डॉ. छेरिंग दोरजे, अतिरिक्त पोलीस आयुक्त निवा जैन आदींनी त्यांचे स्वागत केले. यावेळी त्यांनी विमानतळा बाहेर माध्यम प्रतिनिधींशी संवाद साधला.
मुख्यमंत्री व उपमुख्यमंत्री यांनी आज समृद्धी मार्गाच्या नागपूर येथील झिरो पाँईट येथून प्रवासाला सुरुवात केली. उपमुख्यमंत्री देवेंद्र फडणवीस स्वतः समृद्धी महामार्गावर वाहन चालवत होते. त्यांच्या बाजूला मुख्यमंत्री एकनाथ शिंदे बसले होते. या महामार्गावरून सायंकाळी पाच वाजता शिर्डी येथे पोहचणे अपेक्षित आहे. त्यानंतर शिर्डी विमानतळावरून मुख्यमंत्री महोदय नवी दिल्लीकडे प्रयाण करतील.
पाहणी दौ-याला झिरो पॅाईंटपासून सुरुवात
मुख्यमंत्री एकनाथ शिंदे यांच्या हिंदूहृदयसम्राट बाळासाहेब ठाकरे समृद्धी महामार्गाच्या पाहणी दौ-याला हिंगण्याजवळील झिरो पॅाईंटपासून (सुरुवातीचे ठिकाण) सुरुवात झाली. यावेळी मुख्यमंत्र्यासमवेत उपमुख्यमंत्री देवेंद्र फडणवीस यांच्यासह संबंधित विभागाचे वरिष्ठ अधिकारी पाहणी दौ-यात सहभागी झाले. उपमुख्यमंत्री स्वतः कार चालवित होते.
