नागपूर :- होळीपासून प्रारंभ झालेल्या गणगौर पूजेचे शुक्रवारी २४ मार्च रोजी विसर्जन असून नागपूर महानगरपालिकेतर्फे गांधीबाग उद्यानामध्ये गणगौर विसर्जनाची व्यवस्था करण्यात आली आहे. मनपा आयुक्त तथा प्रशासक राधाकृष्णन बी. यांच्या निर्देशानुसार गांधीबाग उद्यानामध्ये कृत्रिम विसर्जन कुंडांची सुविधा उपलब्ध करण्यात आली आहे.
होळीपासून गणगौर पूजनाला प्रारंभ झाला. १८ दिवस चाललेल्या पूजनाचे उद्या शुक्रवारी विसर्जन करण्यात येणार आहे. नागपूर महानगरपालिकेद्वारे गांधीसागर तलावामध्ये गणगौर विसर्जनाची व्यवस्था करून दिली जात असे. मात्र मागील वर्षीपासून गांधीसागर तलावाच्या सौंदर्यीकरणाचे कार्य सुरू आहे. त्यामुळे मागील वर्षी मनपाद्वारे गांधीबाग उद्यानामध्ये गणगौर विसर्जनाची सोय करण्यात आलेली होती. यावर्षीही तलावाचे सौंदर्यीकरण कार्य सुरू असल्यामुळे गांधीबाग उद्यानामध्येच गणगौर विसर्जन करावे, असे आवाहन मनपाद्वारे करण्यात येत आहे.
