संदीप कांबळे, विशेष प्रतिनिधी
कामठी :- स्थानिक नवीन कामठी पोलीस स्टेशन हद्दीत येणाऱ्या कामठी-कळमना मार्गावरील रणाळा परिसरातील एटीएम केंद्रासमोर 26 जानेवारीच्या रात्री 12 नंतर घडलेल्या अज्ञात इनोव्हा कार व दुचाकी अपघातात दुचाकीस्वार एक्सिस बँक कर्मचाऱ्याचा आज मध्यरात्री 3 दरम्यान नागपूरच्या न्यूरॉन हॉस्पिटलमध्ये उपचारदारम्यान मृत्यूशी झुंज देत अखेर दुर्दैवी मृत्यू झाला असून मृतक तरुणाचे नाव दुर्गेश शगुण पाल वय 28 वर्षे रा न्यू येरखेडा कामठी असे आहे.
पोलिसांनी दिलेल्या माहितीनुसार सदर मृतक दुर्गेश पाल हा कामठीच्या एक्सिस बँक मध्ये नोकरीवर असून 26 जानेवारीच्या रात्री 12 नंतर काही कामानिमित्त होंडा शाईन दुचाकी क्र एम एच 40 ए जी 7869 ने कळमनाच्या दिशेने सदर घटनास्थळ मार्गे जात असता नागपूर हुन कामठीकडे भरधाव वेगाने येत असलेल्या अज्ञात इनोव्हा कार चालकाने दुचाकीला दिलेल्या जोरदार धडकेत घडलेल्या अपघातातून दुचाकीस्वार गंभीर जख्मि झाला तर आरोपी कार चालकाने भीतीपोटी घटनास्थळाहुन पळ काढण्यात यश गाठले. सदर जख्मिला तडकाफडकी सिटी हॉस्पिटल मध्ये उपचारार्थ दाखल करण्यात आले.मात्र परिस्थिती नाजूक असल्याने जखमींला नागपूरच्या न्यूरॉन हॉस्पिटल मध्ये दाखल करण्यात आले. दरम्यान जख्मि तरुणाने मृत्यूशी झुंज देत मध्यरात्री अखेरचा निरोप घेतला. पोलिसांनी यासंदर्भात अज्ञात वाहनचालकविरोधात कायदेशीर गुन्हा दाखल केला असून तपासात सीसीटीव्ही फुटेज ची पाहणी केली असता घटना वेळी एक पांढऱ्या रंगाची इनोव्हा कार दिसत असून त्या कारच्या मागच्या बाजूला महाकाल असे लिहिले आहे तर गाडी नंबर पुसकट असून स्पष्ट दिसून येत नाही.पोलिसांनी तपासाला गती दिली असून आरोपीचा कसून शोध सुरू आहे तर मृतकाला पत्नी,एक तीन वर्षाची चिमुकली मुलगी,आई,वडील,एक लहान भाऊ असा बराच मोठा आप्तपरिवार आहे.
