चंद्रपूर :- चंद्रपूर शहर महानगरपालिकेमार्फत मालमत्ता कर व इतर करांचा एकरकमी भरणा करणाऱ्याना ५० टक्के शास्तीत माफी देण्यात येत असुन रविवार २६ मार्च शास्ती माफी मिळण्याचा अंतिम दिवस आहे. शनिवार व रविवार या सुटीच्या दिवशीही कार्यालये सुरु राहणार असल्याने शास्तीमाफीचा लाभ सर्वांना घेता येणार आहे.
यापुर्वी ६ फेब्रुवारी ते १५ मार्च पर्यंत चंद्रपूर महानगरपालिकेतर्फे मालमत्ता व पाणी कराचा एकरकमी भरणा करणाऱ्यांना मालमत्ता करावरील शास्तीत १०० टक्के सूट देण्यात आली होती. या योजनेचा नागरीकांनी मोठ्या प्रमाणात लाभ घेतला. त्यानंतर १५ मार्च ते २६ मार्च पर्यंत ५० टक्के सुट जाहीर करण्यात आली आहे.
कर वसुलीसाठी विशेष मोहीम राबविण्यात येत असुन वारंवार सूचना देऊनही कर न भरणाऱ्या आणि टाळाटाळ करणाऱ्या दुकानदारांचे गाळे सील करण्याची कारवाई सुरू आहे. मोठ्या प्रमाणात कराची थकबाकी असल्याने वसुलीसाठी प्रत्येक झोननिहाय जप्ती पथक गठीत करण्यात आले असुन सदर जप्ती पथके पुर्ण क्षमतेने कार्यरत आहेत. https://chandrapurmc.org या लिंकवर मालमत्ता कराचा ऑनलाईन भरणा करता येऊ शकतो. शास्तीत सूट मिळविण्यासाठी कार्यालयीन वेळेत भरणा करण्याचे आवाहन मनपा प्रशासनाने केले आहे.
