संदीप कांबळे, विशेष प्रतिनिधी
कामठी :- कामठी तालुक्यात राशन दुकानातुन लाभार्थी शिधापत्रिका धारकाना 3 रुपये किलोने तांदळाची विक्री केली जाते . लाभार्थी तांदूळ घेऊन दुकानाबाहेर पडत नाही तोच अवैध तांदूळ विक्रेता चढ्या भावाने जवळपास 15 रुपये किलोने तांदूळ खरेदी करतात.यात काही लाभार्थी अपवाद ठरू शकतात.हा प्रकार बिनधास्तपने सुरू असून याबाबत पुरवठा विभागाला माहिती आहे मात्र मिळत असलेल्या हिस्स्याचा वाटामुळे सगळे ऑल इज वेल सुरू आहे.रेशनच्या तांदळाचा काळाबाजार हा सर्वश्रुत असताना संबंधित विभाग याकडे अक्षम्य दुर्लक्ष पुरवीत आहे.तेव्हा हा काळाबाजाराचा तांदूळ जातो तरी कुठे?असा प्रश्न येथील सर्वसामान्य नागरिकांना पडला आहे.
पुरवठा विभागाच्या वितरण व्यवस्थेत कामठी तालुक्यात गव्हाची जास्त गरज असताना लाभार्थी शिधापत्रिका धारकांना तांदूळ जास्त मिळत आहे.तर तांदळाची कमी गरज असताना जास्त प्रमाणात तांदळाचे वितरण करण्यात येते. त्यामुळे अतिरिक्त तांदूळ हा काळ्या मार्गाने खुल्या बाजारात जात आहे,3 रुपये किलो ने विकत घेतलेले तांदूळ 15 रुपये किलोने विकताहेत यामुळे यात लाभार्थ्याचा फायदा तर होतोच परंतु यापेक्षाही जास्त व्यापारी आणि पुरवठा विभागाच्या पांढरा पेशा यंत्रणेला मोठ्या प्रमाणात मलिदा मिळत आहे.तेव्हा या प्रकारामुळे हा काळ्या बाजारातील तांदूळ जातो तरी कुठे हा कळकळीचा मुद्दा चव्हाट्यावर आला आहे.त्यामुळे वरिष्ठांनी याबाबत सखोल चौकशी करणे गरजेचे आहे.
