नागपूर :- विभागीय लोकशाही दिनात नागपूर आणि भंडारा जिल्ह्यातील प्रत्येकी एक अशा एकूण दोन तक्रारी प्राप्त झाल्या. या दोन्ही तक्रारींबाबत संबंधित विभागांनी चौकशी व प्रत्यक्ष स्थळ पाहणी करून अहवाल सादर करावे आणि तातडीने विषय सोडवावा अशा सूचना उपायुक्त राजलक्ष्मी शहा यांनी आज दिल्या.
लोकसभा सार्वत्रिक निवडणुकीत आदर्श आचार संहितेमुळे विभागीय लोकशाही दिन स्थगीत ठेवण्यात आला होता. यानंतर आज विभागीय आयुक्त कार्यालयातील रोजगार हमी योजनेच्या उपायुक्त राजलक्ष्मी शहा यांच्या अध्यक्षतेखाली लोकशाही दिन घेण्यात आला.
पोलीस, महसूल, महिला व बालविकास आदी विभागांचे संबंधित अधिकारी यावेळी उपस्थित होते. नागपूर जिल्हाधिकारी कार्यालया अंतर्गत नरखेड तालुक्यातील लोहारा आणि भंडारा जिल्ह्यातील कोटांगले येथील नागरिकांच्या तक्रारी या बैठकीत मांडण्यात आल्या. तक्रारींबाबत संबंधित विभागांनी चौकशी व प्रत्यक्ष स्थळ पाहणी करून अहवाल सादर करत तातडीने विषयाचा निपटारा करण्याच्या सूचना देण्यात आल्या.
