– पालकमंत्री संजय राठोड यांच्या हस्ते वितरण
दारव्हा :- तालुक्यातील भांडेगाव, शेलोडी येथील अनेक कुटुंबांच्या संघर्षाला पालकमंत्री संजय राठोड यांच्या प्रयत्नांमुळे यश आले आणि जवळपास ५२ कुटुंबांना हक्काची जमीन मिळाली. शेलोडी येथील ३७ तर भांडेगाव येथील १५ लाभार्थ्यांना हक्काची जागा त्यांच्या नावे करून देण्यात आली. पालकमंत्री संजय राठोड यांच्या हस्ते सर्व लाभार्थ्यांना दारव्हा येथे या जमिनीच्या लीजपट्ट्यांचे नुकतेच वाटप करण्यात आले.
शेलोडी व भांडेगाव येथील हे लाभार्थी अनेक वर्षांपासून जमिनीचे लीजपट्टे मिळावे म्हणून मागणी करत होते. पालकमंत्री संजय राठोड यांनी या संदर्भात महसूल विभागाला कार्यवाहीचे निर्देश दिले होते. त्यानुसार, सर्व प्रशासकीय बाबींची पूर्तता करून शासन नियमाप्रमाणे शेलोडी येथील ३७ व भांडेगाव येथील १५ लाभार्थ्यांना नमूना आठ अ मध्ये ५०० चौरस फुट इतकी जागा त्यांच्या नावावर करून देण्यात आली. लाभार्थ्यांना आता या जागेवर हक्कोच घर बांधता येणार आहे. पालकमंत्री संजय राठोड यांच्या हस्ते, दारव्हा येथील उपविभागीय अधिकारी सूर्यवंशी, तहसीलदार काळे आदी अधिकाऱ्यांच्या उपस्थितीत सर्व लाभार्थ्यांना लीजपट्टा प्रमाणपत्र वितरित करण्यात आले. यावेळी लाभार्थ्यांनी पालकमंत्री संजय राठोड यांचे आभार मानून त्यांच्या प्रयत्नांमुळे हक्काची जागा मिळून घराचे स्वप्न पूर्ण होणार असल्याने आनंद व्यक्त केला. यावेळी शेलोडी, भांडेगाव येथील नागरिक उपस्थित होते.
