नागपूर :- नागपूरमधील सर्वांत मोठे आणि ऐतिहासिक अंबाझरी उद्यान मागील पाच वर्षांपासून नागपूरकरांसाठी बंद असून, या बंदीमुळे नागरिकांना मोठा त्रास सहन करावा लागत आहे. उद्यान तात्काळ नागरिकांसाठी खुले करा, परमपूज्य डॉ. बाबासाहेब आंबेडकर स्मारकाचे काम सुरू करा, तसेच गरुडा अॅम्युजमेंट्स पार्क (नागपूर) प्रायव्हेट लिमिटेड सोबतचा अन्यायकारक करार रद्द करा, अशी मागणी पश्चिम नागपूरचे आमदार आणि नागपूर शहर (जिल्हा) काँग्रेस कमिटीचे अध्यक्ष विकास ठाकरे यांनी केली आहे.
मुख्यमंत्री एकनाथ शिंदे यांना पत्र लिहून ठाकरे यांनी या मागण्यांसाठी १ ऑक्टोबरची अंतिम मुदत दिली आहे. ठाकरे यांनी हेच पत्र केंद्रीय मंत्री आणि नागपूरचे खासदार नितीन गडकरी तसेच उपमुख्यमंत्री आणि नागपूरचे पालकमंत्री देवेंद्र फडणवीस यांनाही पाठवले आहे.
मागील अनेक वर्षांपासून नागपूर महानगरपालिका अंबाझरी उद्यानाचे व्यवस्थापन सांभाळत होती. मात्र, 3 जुलै 2017 रोजी महाराष्ट्र सरकारने उद्यानाचे व्यवस्थापन महाराष्ट्र पर्यटन विकास महामंडळाला (MTDC) हस्तांतरित केले. सरकारने उद्यानाच्या पुनर्विकासासाठी आर्थिक मदत देण्याऐवजी व्यवस्थापन बदलल्याने नागरिकांना त्रास सहन करावा लागत आहे.
22 नोव्हेंबर 2019 रोजी MTDC ने गरुडा अॅम्युजमेंट्ससोबत 30 वर्षांसाठी करार केला, आणि यानंतर उद्यान सर्वांसाठी बंद करण्यात आले. या उद्यानातील अनेक सुविधा, जसे की मुलांचे खेळाचे मैदान, मनोरंजन क्षेत्रे, आणि चालण्यासाठी असलेले मार्ग, पूर्णपणे उपेक्षित आहेत. उद्यानातील हरियाली मागील पाच वर्षांत मोठ्या प्रमाणात नष्ट झाली आहे.
याशिवाय, गरुडा अॅम्युजमेंट्स पार्कने उद्यानातील डॉ. बाबासाहेब आंबेडकर सांस्कृतिक भवन पाडल्यामुळे नागपूरकरांमध्ये तीव्र संताप आहे. या प्रकरणावर सुमारे 160 दिवस नागरिकांनी आंदोलन केले, मात्र सरकारने कोणतीही ठोस कारवाई केली नाही. विभागीय आयुक्तांनीही हे पाडकाम अवैध ठरवले आहे, तरीसुद्धा आजतागायत कंपनीवर कोणतीही कठोर कारवाई झालेली नाही.
ठाकरे यांनी मुख्यमंत्र्यांकडे त्वरित करार रद्द करून कंपनीला काळ्या यादीत टाकण्याची, दंड लावण्याची, आणि बँक गॅरंटी जप्त करण्याची मागणी केली आहे. तसेच, उद्यानाच्या आरक्षणाला पर्यटन विकास प्रकल्पातून अंबाझरी उद्यानाच्या मूळ स्वरूपात परत आणून, परमपूज्य डॉ. बाबासाहेब आंबेडकर स्मारकाच्या बांधकामाची तातडीने सुरुवात करण्याचीही मागणी त्यांनी केली आहे.
