नागपूर :- नागपूर विभागीय महसूल क्रीडा व सांस्कृतिक स्पर्धांचे आयोजन उद्यापासून नागपूर येथे होत असून या स्पर्धांसाठी मानकापूर येथील विभागीय क्रीडा संकुल विविध सुविधांनी सज्ज झाले आहे. जिल्हाधिकारी डॉ. विपीन इटनकर यांनी आज क्रीडा स्पर्धा आयोजनाची तयारी व व्यवस्थेची पाहणी करून आढावा घेतला. यावेळी क्रीडा उपसंचालक शेखर पाटील, जिल्हा क्रीडा अधिकारी पल्लवी धात्रक, उपजिल्हाधिकारी शेखर गाडगे प्रामुख्याने उपस्थित होते.
शनिवार व रविवार या दोन दिवस चालणाऱ्या क्रीडा स्पर्धेत नागपूर, वर्धा, भंडारा, गोंदिया, चंद्रपूर व गडचिरोली या सहा जिल्ह्यातील महसुल विभागाचे सुमारे 1500 अधिकारी-कर्मचारी स्पर्धक भाग घेत आहेत. स्पर्धेच्या आयोजन विभागीय आयुक्त विजयलक्ष्मी बिदरी यांच्या मार्गदर्शनात करण्यात येत आहे.
