– आवश्यक सुचनांची अंमलबजावणी करण्याचे निर्देश, लवकरच होणार युनिट कार्यान्वित
नागपूर :- केंद्रीय आरोग्य आणि कुटुंबकल्याण मंत्रालयाच्या अंतर्गत आरोग्य सेवा महासंचालक (डीजीएचएस) डॉ. अतुल गोयल यांनी शुक्रवारी (ता.२१) नागपूर महानगरपालिकेच्या मेट्रोपॉलीटन सर्वेलन्स यूनिट (एमएसयू) इमारतीच्या कामाची पाहणी केली. एपीएचओ नागपूर तथा राष्ट्रीय रोग नियंत्रण केंद्रच्या नोडल अधिकारी डॉ. आराधना भार्गव, अतिरिक्त वैद्यकीय आरोग्य अधिकारी डॉ. नरेंद्र बहिरवार, उपअभियंता देवचंद काकडे यांच्यासह विद्युत विभागाचे अधिकारी व कंत्राटदार उपस्थित होते.
भारत सरकारच्या आरोग्य व कुटूंब कल्याण मंत्रालयाद्वारे महाराष्ट्र राज्यासाठी राष्ट्रीय रोग नियंत्रण केंद्र (एनसीडीसी) शाखा आणि मेट्रोपॉलीटन सर्वेलन्स यूनिट (एमएसयू) नागपूर महानगरपालिकेमध्ये स्थापन करण्याचा निर्णय घेण्यात आलेला आहे. मनपा आयुक्त तथा प्रशासक डॉ. अभिजीत चौधरी यांच्या मार्गदर्शनात व वैद्यकीय आरोग्य अधिकारी डॉ. दीपक सेलोकर यांच्या नेतृत्वामध्ये मनपाच्या के.टी. नगर नागरी प्राथमिक आरोग्य केंद्रालगतच्या इमारतीमध्ये मेट्रोपोलीटन सर्वेलन्स यूनिट (एमएसयू) सुरु करण्याबाबत कार्यवाही सुरु आहे. या केंद्राकरिता इमारतीमध्ये आवश्यक कार्य सुरु असून ते लवकरच पूर्ण होणार आहेत.
आरोग्य सेवा महासंचालक (डीजीएचएस) डॉ. अतुल गोयल यांनी इमातीमध्ये सुरू असलेल्या केंद्राच्या कामाचा आढावा घेतला. कुठल्याही संसर्गजन्य आजाराचा संभाव्य धोका वाढल्यास सुरक्षा आणि नागरिकांच्या सुरक्षेच्या दृष्टीने चाचणी केंद्र हे सुलभ असणे आवश्यक आहे. त्यादृष्टीने इमारतीच्या तळमजल्यावर चाचणी केंद्र स्थापित करण्याबाबत डॉ. गोयल यांनी यावेळी निर्देश दिले. याशिवाय त्यांनी विविध तांत्रिक बाबींवर देखील आपल्या सूचना नोंदविल्या व त्यांची अंमलबजावणी करण्याबाबत निर्देशित केले.
नागपूर महानगरपालिकेमध्ये मेट्रोपॉलीन सर्वेलन्स यूनिट संदर्भात राष्ट्रीय रोग नियंत्रण केंद्र (एनसीडीसी) दिल्ली, आरोग्य व कुटुंब कल्याण विभाग, मुंबई आणि नागपूर महानगरपालिका यांच्यामध्ये सामंजस्य करार झालेला आहे.
मेट्रोपोलीटन सर्वेलन्स यूनिट (एमएसयू) चा मुख्य उद्देश
१) आयडीएसपी अंतर्गत सूचीबद्ध आजारांचे सर्वेक्षण, तसेच सर्वेक्षण कामांचे बळकटीकरण करणे. (सूचीबद्ध आजार- Anthrax, Chicken Pox, Chikungunya, Dengue, Diphtheria, Human Rabies, Leptospirosis, Malaria, Measles, Meningitis, Mumps, Pertussis, Scrub Typhus, Typhus, Ebola Virus disease, Zika Virus, Nipah, Yellow Fever, Brucellosis etc.)
२) मेट्रोपोलीटन सर्वेलन्स यूनिट (एमएसयू) संसर्गजन्य रोगांच्या उद्रेकासाठी अलर्ट ओळखेल आणि प्रतिसादासाठी तांत्रिक मार्गदर्शन करेल.
३) मेट्रोपोलीटन सर्वेलन्स यूनिट (एमएसयू) सुरु झाल्यास त्याद्वारे विविध साथीच्या आजारांचे रोग सर्वेक्षण आणि त्यावर त्वरित उपाययोजना करणे साध्य होईल.
४) याकरिता केंद्रीय स्तरावरून निधी मंजूर करण्यात आलेला आहे. सुसज्य अशी प्रयोगशाळा येथे स्थापन करण्यात येणार आहे.
