यवतमाळ :- सामाजिक न्याय विभागाच्यावतीने अनुसूचित जातीच्या विद्यार्थ्यांसाठी शिष्यवृत्ती, शिक्षण शुल्क व परिक्षा शुल्क प्रदाने, वसतीगृहाच्या विद्यार्थ्यांसाठी विद्यावेतन अशा योजना राबविण्यात येतात. महाविद्यालयांनी या योजनेच्या पात्र विद्यार्थ्यांचे अर्ज भरून घेऊन मुदतीत सादर करण्याचे आवाहन करण्यात आले आहे.
सन 2023-24 या शैक्षणिक वर्षातील अनुसूचित जाती प्रवर्गातील विद्यार्थ्यांसाठी महाडीबीटी प्रणालीवर भारत सरकार मॅट्रिकोत्तर शिष्यवृत्ती, शिक्षण शुल्क, परिक्षा शुल्क प्रदाने, राजर्षी शाहु महाराज गुणवत्ता शिष्यवृत्ती, व्यावसायिक पाठ्यक्रमांशी संलग्न असलेल्या वसतिगृहातील विद्यार्थ्यांना विद्यावेतन या योजना राबविण्यात येतात.
या शैक्षणिक वर्षातील या योजनांचे प्रथम वर्षाचे व नुतनीकरणाचे अर्ज भरण्यासाठी दि. 11 ऑक्टोबर 2023 पासून महाडीबीटी पोर्टल माहिती तंत्रज्ञान विभागामार्फत सुरु करण्यात आले आहे. महाविद्यालयांनी विद्यापीठ व शिक्षण शुल्क समिती यांच्याकडील शुल्क मंजूर होणे ही कार्यवाही संबधित यंत्रणेची आहे. महाविद्यालयांनी फी मंजुरी बाबत तात्काळ विद्यापीठाकडे संपर्क साधून फी मंजुर करुन घेणे आवश्यक आहे.
महाविद्यालयांनी विद्यार्थ्याकडून शिष्यवृत्तीचे अर्ज भरुन घ्यावे व पात्र विद्यार्थ्यांचे परिपुर्ण अर्ज मुळ टीसीसह मंजुरीसाठी सहाय्यक आयुक्त, समाज कल्याण कार्यालयाकडे दि. 30 जुन पुर्वी ऑनलाईन सादर करावे. शिष्यवृत्ती अभावी विद्यार्थी वंचित राहिल्यास त्याची सर्वस्वी जबाबदारी महाविद्यालय प्राचार्यांची राहील तसेच त्रुटीतील अर्ज विद्यार्थी लॉगिनला परत करण्यात यावे. पात्र विद्यार्थ्यांकडुन शुल्क घेण्यात येवू नये, असे आवाहन समाज कल्याण विभागाचे सहाय्यक आयुक्त भाऊराव चव्हाण यांनी केले आहे.
