नागपूर :- कृषी व संलग्न क्षेत्र तसेच फलोत्पादन क्षेत्रामध्ये उल्लेखनीय कार्य करणाऱ्या शेतकरी, संस्था, गट आणि कृषी विभागामध्ये उल्लेखनीय कार्य करणाऱ्या अधिकारी-कर्मचाऱ्यांना राज्य शासनाच्या कृषी विभागामार्फत विविध पुरस्काराने गौरविण्यात येणार असून वर्ष 2023 करिता नागपूर विभागातून जास्तीत- जास्त प्रस्ताव पाठविण्याचे आवाहन, विभागीय कृषी सहसंचालक शंकरराव तोटावार यांनी केले आहे.
![](https://newstoday24x7.com/wp-content/uploads/2024/08/dggds.jpg)
कृषी उत्पादन आणि उत्पन्न वाढीकरिता योगदान देणाऱ्या शेतकऱ्यांचा तसेच कृषी विस्तारामध्ये बहुमोल कामगिरी करणाऱ्या व्यक्ती, संस्था आणि गट यांना ‘डॉ. पंजाबराव देशमुख कृषी रत्न पुरस्कार’, ‘वसंतराव नाईक कृषिभूषण पुरस्कार’ ,’जिजामाता कृषीभूषण पुरस्कार’, ‘कृषिभूषण (सेंद्रिय शेती)पुरस्कार, ‘उद्यान पंडित पुरस्कार’, ‘वसंतराव नाईक शेती मित्र पुरस्कार’, ‘वसंतराव नाईक शेतीनिष्ठ शेतकरी पुरस्कार’, ‘युवा शेतकरी पुरस्कार’ तसेच कृषी विभागामध्ये उल्लेखनीय कार्य करणाऱ्या अधिकारी- कर्मचारी यांना ‘पद्मश्री डॉ.विठ्ठलराव विखे पाटील कृषी सेवा रत्न पुरस्कार’ प्रदान करून सन्मानित करण्यात येते.
जास्तीत -जास्त गट, संस्था, व्यक्ती यांनी या कृषी पुरस्कारांसाठी प्रस्ताव आपल्या नजीकच्या तालुका कृषी अधिकारी कार्यालयाकडे सादर करावेत, असे आवाहन राज्याचे कृषी आयुक्त रवींद्र बिनवडे यांनी केले आहे. या पुरस्काराविषयी अधिक माहितीसाठी नजीकच्या तालुका कृषी अधिकारी कार्यालयाशी संपर्क साधता येणार आहे.
![](https://newstoday24x7.com/wp-content/uploads/2024/03/Dphysiiocare-2.jpeg)