Ø योजनेचा लाभ घेण्याचे आवाहन
Ø गॅस एजन्सीधारकांसोबत बैठक
यवतमाळ :- राज्य शासनाने मुख्यमंत्री अन्नपूर्णा योजनेची घोषणा केली आहे. या योजनेंतर्गत जिल्ह्यातील प्रधानमंत्री उज्वला योजनेच्या लाभार्थ्यांना तसेच मुख्यमंत्री माझी लाडकी बहीण योजनेच्या पात्र लाभार्थ्यांनाही वार्षिक 3 गॅस सिलेंडरचे पुनर्भरण मोफत उपलब्ध करून देण्यात येणार आहे.
मुख्यमंत्री अन्नपूर्णा योजनेच्या अनुषंगाने जिल्ह्यातील सर्व गॅस कंपनीचे सेल्स ऑफिसर आणि एजन्सीधारक यांची सभा प्रभारी जिल्हा पुरवठा अधिकारी संघपाल मेश्राम यांच्या अध्यक्षतेखाली घेण्यात आली. योजनेची अंमलबजावणी करण्यात येत असून जिल्ह्यातील सर्व पात्र लाभार्थ्यांनी याचा लाभ घ्यावा, असे आवाहन यावेळी प्रभारी जिल्हा पुरवठा अधिकारी मेश्राम यांनी केले.
योजनेंतर्गत जिल्ह्यातील सर्व पात्र लाभार्थ्यांना ३ गॅस सिलेंडरचे मोफत पुनर्भरण वितरण करणे, मोहिमेची जनजागृती करणे याबाबत बैठकीत चर्चा करण्यात आली. प्रधानमंत्री उज्वला योजना आणि लाडकी बहीण योजनेमधील लाभार्थ्यांनी आपल्या संबधित गॅस एजन्सीमध्ये बँक पासबुक आणि आधारकार्डसह जावून ई-केवायसी करण्याबाबत आवाहन करण्यात आले आहे.