![](https://newstoday24x7.com/wp-content/uploads/2024/06/BJP-Half-page_page-0001.jpg)
– पर्यावरणाला घातक ठरणाऱ्या कॅरीबॅग ऐवजी कापडी पिशव्या वापरण्याचे आवाहन
![](https://newstoday24x7.com/wp-content/uploads/2024/06/WhatsApp-Image-2024-06-06-at-16.46.34_c08487b5.jpg)
नागपूर :- पर्यावरणाला घातक असणाऱ्या प्लास्टीक कॅरीबॅग व इतर पिशव्यांचा सूमारे 4 हजार 570 किलो एवढा साठा जिल्हा प्रशासनाने वाडी येथे आज दिनांक 21 जून रोजी दुपारी 4.30 वाजता धाड टाकून जप्त केला. जिल्हाधिकारी डॉ. विपीन इटनकर यांच्या मार्गदर्शनाखाली उपविभागीय अधिकारी आकाश अवतारे, वाडी नगरपरिषदेचे मुख्याधिकारी विजय देशमुख तहसीलदार बाळासाहेब टेळे व पोलीस अधिकारी या कारवाईत सहभागी होते. देविका ट्रान्सपोर्ट, कन्ट्रोल वाडी व अभिनव लॉजेस्टीक अमरावती रोड, वाडी येथे हा साठा होता. जप्त केलेला साठा सिंगल युज प्लास्टीक प्रकारात मोडणारा असून शासनाने त्यावर बंदी घातलेली आहे.
पर्यावरणाला यापासून मोठ्या प्रमाणात आव्हान निर्माण झाल्यामुळे वेळोवेळी नागरिकांना कॅरीबॅग ऐवजी कापडी पिशव्यांचा वापर करावा, असे वेळोवेळी आवाहन जिल्हा प्रशासनामार्फत केले जात आहे. तथापि यावर बंदी असूनही सिंगल युज कॅरीबॅगचा बाजारपेठेत वापर होत असल्याचे आढळून आल्याने या कारवाईने कायद्याचा धाक निर्माण झाला आहे. संबंधित साठवणूक करणाऱ्यांवर प्रत्येकी पाच हजार रुपयांचा दंड ठोठावण्यात आला. यापूढे कारवाई अधिक मोठ्या प्रमाणात वाढवू असे जिल्हा प्रशासनाच्या वतीने कळविण्यात आले आहे.