– खेलो इंडिया पॅरा गेम्स
– ॲथलेटिक्समध्ये तीन रौप्यपदकांचीही कमाई
– अक्षय सुतारला लांब ऊडीत ब्राँझपदक
– ऋतुजा कवटाळेला २०० मीटरमध्ये ब्राँझपदक
– बॅडमिंटनमध्ये आरती पाटील अंतिम फेरीत
नवी दिल्ली :- महाराष्ट्राच्या पॅरा क्रीडापटूंनी पहिल्या खेलो इंडिया पॅरा क्रीडा स्पर्धेत जोरदार सुरुवात करताना सोमवारी ॲथलेटिक्स प्रकारात एक सुवर्ण आणि तीन रौप्य आणि तीन कांस्यपदकांची कमाई केली. बॅडमिंटनमध्ये आरती पाटीलने अंतिम फेरी गाठून महाराष्ट्राचे आणखी एक पदक निश्चित केले.
ॲथलेटिक्स क्रीडा प्रकारात महिलांच्या भालाफेक प्रकारात नांदेडच्या भाग्यश्री जाधवने महाराष्ट्राला पहिले सुवर्णपदक मिळवून दिले. त्यानंतर बॅडमिंटनमध्ये आरती पाटीलने दुसरे सुवर्णपदक मिळविले. ॲथलेटिक्समधील अन्य क्रीडा प्रकारात दिलीप गावीत, गीता चव्हाण, शुभम सिंगनाथ यांनी आपापल्या शर्यतीत रौप्यपदकाची कमाई केली.
आरतीने सुवर्ण कामगिरी करताना एफ-३३/३४ प्रकारात १३.५७ मीटर भाला फेक केली. पुरुषांच्या टी ४७ प्रकारात नाशिकचा दिलीप गावित १०० मीटर धावण्याच्या शर्यतीत ११.४१ सेकंद वेळेसह रौप्यपदकाचा मानकरी ठरला. नागपूरच्या शुभम सिंगनाथने टी १२ या प्रकारातून १०० मीटर शर्यतीत १२.०१ सेकंद वेळ देताना रौप्यपदक मिळविले. महिलांच्या १०० मीटर धावण्याच्या शर्यतीत मुंबईच्या गीता चव्हाणने टी ५३/५४ प्रकारात २४.८६ सेकंदासह रुपेरी यश मिळविले. अक्षय सुतार लांब ऊडीतील टी १३ प्रकारात कांस्यपदकाचा मानकरी ठरला. त्याने ५.२९ मीटर उडी मारली.
ॲथलेटिक्समध्ये ऋतुजा कवटाळेने टी ४७ प्रकारात २०० मीटर धावण्याच्या शर्यतीत ब्राँझपदक मिळविले. तिने ३१.५३ सेकंद वेळ दिली. दिवसाच्या अखेरीस अकुताई भगतने महाराष्ट्राला आणखी एक ब्राँझपदक मिळवून दिले. अकुताईने थाळीफेक प्रकारात ही कामगिरी करताना १३.९० मीटर फेक केली. 
बॅडमिंटनमध्ये एसयु ५ प्रकारात आरती पाटीलने आपले दुसरे मानांकन सार्थकी लावताना कौशिका देवडाचा २१-११, २१-१८ असा पराभव करुन अंतिम फेरी गाठली.
*धावपटूंची कामगिरी कौतुकास्पद – सुरेश काकड*
पहिल्या पॅरा क्रीडा स्पर्धेत आंतरराष्ट्रीय धावपटू दिलीप गावित, शुभम सिंगनाथ, गीता चव्हाण यांनी पदार्पणात सुरेख कामगिरी केली. आंतरराष्ट्रीय अनुभवाचा त्यांनी सुरेख फायदा करून घेतला. संघासाठी ही कामगिरी निश्चितच अभिमानास्पद ठरली, अशी प्रतिक्रिया संघाचे मुख्य प्रशिक्षक सुरेश काकड यांनी व्यक्त केली.
