आयुक्तांनी केली करारनाम्यावर स्वाक्षरी
नागपूर : नागपूर शहरात दररोज निर्माण होणारा बांधकाम आणि पाडाव (Construction and Demolition) कचरा कमी होणार असून शहर आणखी स्वच्छ आणि सुंदर होण्यास मदत होणार आहे. रामकी एन्व्हायरो इंजिनियर लिमिटेड अंतर्गत कार्यरत हैद्राबाद सी अँड डी वेस्ट प्रा. कंपनीतर्फे नागपूर महानगरपालिका हद्दीतील बांधकाम व पाडाव वेस्टवर पुनर्वापर प्रक्रिया करण्यात येणार आहे. यासंबंधी नागपूर महानगरपालिका आणि रामकी हैद्राबाद सी अँड डी वेस्ट प्रा. कंपनीमध्ये करार करण्यात आला असून शुक्रवारी (ता. २५) मनपाच्या प्रशासकीय इमारतीमधील आयुक्तांच्या कक्षात आयुक्त राधाकृष्णन बी. यांच्या उपस्थितीत मनपाच्या सार्वजनिक आरोग्य अभियांत्रिकी विभागाच्या कार्यकारी अभियंता डॉ. श्वेता बॅनर्जी आणि कंपनीच्या वरिष्ठ सहाय्यक व्यवस्थापक माधवी जी यांनी स्वाक्षऱ्या केल्या.
यावेळी उपअभियंता राजेश दुफारे, रामकी एन्व्हायरो इंजिनियर लिमिटेडचे व्यवस्थापक मेहबूब सुभानी शेख, कनिष्ठ अभियंता प्रशांत वाघमारे, सल्लागार मेसर्स आर जगताप अँण्ड असोसिएट तर्फे यादव आदी उपस्थित होते.
सदर कंपनीला प्रक्रिया युनिट तयार करण्यासाठी मनपातर्फे भांडेवाडी येथे ५ एकर जमीन देण्यात आलेली आहे. कंपनीच्या व्यवस्थापकांनी शुक्रवारी जमिनीची पाहणी सुद्धा केली. कंपनी प्रति दिवस जवळपास २०० टन सी अँड डी कचऱ्यावर पुनर्वापराची प्रक्रिया करणार आहे. यातून बांधकामाला लागणारे साहित्य जसे की, रेती, विटा, पेव्हर ब्लॉक, टाईल्स बनविण्यात येणार आहे. सी अँड डी कचरा शहरातून गोळा करण्यासाठी संपूर्ण पायाभूत सुविधांची व्यवस्था कंपनी करणार आहे. अशा प्रकारचा दुसरा प्रकल्प महाराष्ट्रात आता नागपूर महानगरपालिका हद्दीत सुरु होत आहे.
या प्रकल्पामुळे शहरात रस्त्याच्या कडेला, मोकळ्या जागांवर, निवासी भागातील सी अँड डी कचरा पूर्णपणे कमी होईल. यामुळे नागपूर शहर अधिक स्मार्ट आणि स्वच्छ होण्यास मदत होणार आहे.